किपूमिपाखें यातायात जाम
त्रिभुवन विश्वविद्यालय दयेकूगु इलय् अधिग्रहण याःगु जग्गाया मुआब्जा मबिउगु व उगु इलय् जूगु सहमति कार्यान्वयन मयाः धासें थौं सुथंनिसें किपूया स्थानीय जनतां बल्खुइ प्रदर्शन याःगु दु । थ्व झ्वलय् उमिसं लँय् टायर च्याकातःगुलिं बल्खुइ यातायात ठप्प जुयाच्वंगु दु ।
स्थानीय जनतां त्रिभुवन विश्वविद्यालयया ३२ गू विभागय् न्याम्ह न्याम्हया ल्याखं किपूया जनतायात जागीर नकेमाःगु विश्वविद्यालय दयेकाः ल्यं दुगु जग्गा थःपिंत तुं लित बीमाःगु व त्रिवि शिक्षण संस्थाय् निःशुल्क वासः यायेगु व्यवस्था यायेमाःगु लिसें न्यागू माग तयाः वंगु शुक्रवाःनिसें आन्दोलन याना वयाच्वंगु खः ।
उगु लागाय् यातायात ठप्प जुयाः ज्याय् वनेमाःपिं कर्मचारीया लिसें स्कूलया विद्यार्थीत नं प्रभावित जुयाच्वंगु दु ।
