विवादित उपरथी सिंहया बढुवा
कोइरालाया नां नोबल शान्ति सिरपाया निंतिं सिफारिश
द्वन्द्वकालय् भैरवनाथ गणय् बन्दीत बेपत्ता याःगु द्वपं लानाच्वंम्ह विवादित उपरथी तोरणजंगबहादुर सिंहयात सरकारं बढुवा यायेगु निर्णय याःगु दु । राष्ट्रिय व अन्तर्राष्ट्रिय दबाबयात बेवास्ता यासें सरकारं द्वन्द्वकालय् भैरवनाथ गणया प्रमखु सिंहयात बढुवा यायेगु निर्णय याःगु खः ।
बिहीवाः च्वंगु मन्त्रिपरिषदया बैठकय् रक्षामन्त्री विद्यादेवी भण्डारीं सिंहयात बढुवा यायेमाःगु अडान कायेवं वयेकयात बढुवा याःगु खः । बढुवा लिपाः सिहं नेपाली सेनाया वरियताक्रमय् प्रधानसेनापति छत्रमानिसंह गुरुङ लिपाः निगूगु थासय् लाइ ।
भैरवनाथ गण व युद्धभैरव गणं पीगुम्ह थुनुवायात २०६० सालया पुसय् बेपत्ता याःगु द्वपंनय् राष्ट्रिय मानवअधिकार आयोग, राष्ट्रसंघीय मानवअधिकार उच्चायुक्तया ज्याकू लगायत राष्ट्रिय व अन्तर्राष्ट्रिय मानवअधिकार संस्थातय्सं सिंहयात बढुवया मयायेत सरकारयात दबाव बियाच्वंगु खः ।
मन्त्रिपरिषदया बैठकं राष्ट्रिय सुरक्षा निकाययात समयानुकूल लोकतान्त्रिकरण यायेगु निंतिं रक्षामन्त्री भण्डारीया हे संयोजकत्वय् छगू समिति गठन याःगु दु । समितिलय् गृहमन्त्री भीम रावल, संस्कृति मन्त्री मिनेन्द्र रिजाल, कानुनमन्त्री प्रेमबहादुर सिंह व बिना विभागीय मन्त्री लक्ष्मणलाल कर्ण दुजः कथं दु ।
अथेहे सरकारं नोबल शान्ति पुरस्कारया निंतिं पुलांम्ह प्रधानमन्त्री व नेपाली कांग्रसया सभापति गिरिजाप्रसाद कोइरालाया नां सिफारिश यायेगु निर्णय याःगु दु । नोबल शान्ति पुरस्कारया निंतिं राष्ट्रिय विधायिकाया दुजतय्सं व सरकारं नां सिफारिश यायेगु प्रावधान दु ।
नापं सरकारं नेपाःस्थित राष्ट्रसंघीय मिसन (अनमिन)या म्याद थप यायेगु निर्णय नं याःगु दु । अनमिनया म्याद थ्वहे वइगु माघ ९ गते फुइत्यंगु दु । सरकारं सुन्तली धामी बलात्कार प्रकरणय् छानबिन यायेत समिति गठन व आक्रमण पाखें घाःपाः जुम्ह रुकुमया पत्रकार टीका विष्टयात राहत व वासः याकेत स्वंगु लख तका ग्वाहालि यायेगु निर्णय याःगु दु ।
