नेवाः राज्यया निंतिं त्वाःत्वालय् सहलह
येँ (सन्ध्या टाइम्स)/वइगु पुस ११ गते नेवाः स्वायत्त राज्य घोषणा यायेगु निंतिं नेवाःत सक्रिय जुयाः थःथःगु कथं अभियानत न्ह्याकाच्वंगु दु। थ्वहे झ्वलय् नेवाः स्वायत्त राज्य घोषणा तयारी कथं प्रचार प्रसार यायेगु नापं त्वाःत्वाः नापं गुथि गुथिइ च्वंपिं नेवाःतलिसे सहलह ब्याकेगु झ्वलय् थनिंनिसें स्वनिगःया येँ, यल, ख्वप, थिमि, किपू नापं गांगामय् सहलह मुँज्याया अभियान हे न्ह्याकूगु दु ।
थौं सुथंनिसें त्वाःत्वालय् अथे सहलह मुँज्या न्ह्याकूगु खःसा बहनी थाय्थासय् कोणसभा जुइगु जानकारी नेवाः स्वायत्त राज्य घोषणा ज्याझ्वःया ग्वसाः खलकं बिउगु दु ।
नेवाः स्वायत्त राज्यया निंतिं नेवाःतय्सं थःथःगु त्वालय् नापं छेँय् छेँय् नेवाः ध्वाँय् तकं तयाहःगु दु। नेवाः स्वायत्त राज्यया निंतिं प्रचार प्रसारयात तीब्रता बीगु निंतिं थनिंनिसें नेवाः वस्ती वस्तीइ माइकिङ यायेगु नं शुरु याःगु दु। थ्वहे झ्वलय् थौं मंकाः संघर्ष समितिं नेवाः राज्यया निंतिं नेपालभाषा ख्यःया बुद्धिजीवीपिंलिसे सहलह याइगु जूगु दु ।
