मतदान यानाः खँ क्वःछीत सहमत
येँ (सन्ध्या टाइम्स)/संविधानसभाया संवैधानिक समितिइ विवाद जुयाः क्वःछी मफयाच्वंगु विषययात कयाः मतदान यानाः क्वःछीगु खँय् सहमति जूगु दु। संविधानसभाया नायः सुवासचन्द्र नेम्वाङं थौं एनेकपा (माओवादी), नेपाली कांग्रेस व नेकपा (एमाले) या शीर्ष नेतातलिसे सहलह ब्याकाः उगु कथं खँ क्वःछिउगु खः ।
संवैधानिक समितिपाखें संविधानया प्रस्तावना, संकटकालया ब्यवस्था, राष्ट्रिय चिंनिसें ध्वाँय् नापं थीथी पक्षयात कयाः खँ क्वःछी फयाच्वंगु मदुनि ।
उगु समितिइ विवाद जुयाच्वंगु विषययात कयाः कन्हय् तक नं सहमतिया निंतिं कुतः यायेगु, मखुसा कंस शुक्रवाःनिसें हे मतदान प्रक्रियाय् वनेगु धकाः थौं सहमति जूगु खः। थौंया सहलह ज्याझ्वलय् माओवादीया नायः प्रचण्ड, नेपाली कांग्रेस संसदीय दलया नेता रामचन्द्र पौडेल व एमालेया नायः झलनाथ खनालं ब्वति कयादीगु खः ।
लुमंकेबहःजू छुं दिं न्ह्यः हे अथे विवाद जूगु विषययात कयाः मतदान प्रक्रियाय् वनेगु धकाः संवैधानिक समितिइ सहमति जूगु खः लिपा हाकनं दलतय्गु दथुइ कचमच जुइवं थौं शीर्ष नेतातय्गु हे मुँज्या च्वनाः अथे सहमति ब्वलंकूगु खः ।
