नेप्से थहां ५ अंकं वन
येँ (सन्ध्या टाइम्स)/नेपाल स्टक एक्सचेन्जया शेयर कारोबारं बजाः परिसुचक थहां वंगु दु। वंगु वाःया दथुइ लाक्क कुहां वयेगु शुरु जूगु नेप्से परिसुचक म्हिगःया कारोबारं थहां वंगु दु। झण्डै छवाः तक लगातार कुहां वःगु नेप्से हाकनं थहां वंगु खः। शेयर बजाः चाःगु करीब घौछि तक सामान्य गतिं जक थहां वनाच्वंगु नेप्से वयां लिपा छुं भचा अंकं च्वय् थहां वंगु खः। थ्वयां नं घौछि लिपा छक्वलं ४ अंकं नेप्से थहां वंगु खः। थ्व क्रम शेयर कारोबारया अन्त तकं कायम जुयाच्वंगु खः ।
नेप्से जक मखसे मखसे कारोबार जूगु दक्वं समुहया सुचक नं थहां वंगु दु। थ्व क्रमय् दकलय् अप्वः नेप्से परिसुचक ४ दशमलव ९३ अंकं थहां वनाः ५४१ दशमलव ८६ अंकय् थ्यंगु दु। सेन्सेटिभ नं शुन्य दशमलव ६४ अंकं थहां वनाः १३३ दशमलव शुन्य ४ अंकय् थ्यंगु दुसा फ्लोट शुन्य दशमलव ३९ अंकं थहां वनाः ५१ दशमलव ४ अंकय् थ्यन ।
उखे कारोबार जूगु दक्वं परिसुचक थहां वंगु दुसा उपसुचकय् नं जलविद्युत समुह छगू बाहेकं मेगु दक्वं उपसुचक थहां वंगु दु। थहां वंगु उपसुचकय् वाणिज्य समुह ४ दशमलव ४२ अंकं थहां वनाः ५१५ दशमलव ७३ अंकय् थ्यंगु दु। विकास बैंक समुहया सुचक नं ९ दशमलव ४२ अंकं थहां वनेवं ५९५ दशमलव ६ अंकय् थ्यंगु दु ।
अथे हे कारोबार जूगु फाइनान्स समुहया सुचक शुन्य दशमलव ९ अंकं थहां वनाः ५६२ दशमलव ९७ अंकय् थ्यंगु दु। वीमा समुह नं २ दशमलव ८१ अंकं थहां वनाः ५७५ दशमलव ४३ अंकय् थ्यन। कारोबार जूगु समुह मध्ये दकलय् अप्वः अन्य समुहया सुचक १० दशमलव ५७ अंकं थहां वंगु दु। उखे जलविद्युत समुह छगू जक ४ दशमलव शुन्य ६ कुहां वनाः ७८८ दशमलव १४ अंकय् थ्यंगु दु ।
नेपाल स्टक एक्सचेन्जं बिउगु जानकारी कथं नेप्से थहां वंसां थुकिया ल्याखय् कारोबार धाःसा थहां वने फयाच्वंगु मदु। शेयर बजाःया विश्लेषकतय् कथं नेप्से थहां वंसां दांया कारोबार थहां मवंगुलिं नेप्से थहां वनेगु क्रमं निरन्तरता मकाइगु खँ धाःगु दु। नेप्से थहां वंसां न्यय्स्वंगू कम्पनीया न्हय्गुद्वः व खुसः व नीन्यागू कित्ता शेयर न्याये-मी जुयाः प्यंगू करोड झिंनिगू लाख ख्वीनिद्वः तका दांया कारोबार जुल ।
शेयर कारोबार जूगु कम्पनी मध्ये स्वीगुंगूया शेयर भाः थहां वंगु दुसा झिगू कम्पनीया भाः कुहां वंगु दु। अथे हे प्यंगू कम्पनीया भाः यथावत जुल। अरुण भ्याली हाइड्रो पावर डेभलपमेण्ट कं. लि.या शेयरय् दकलय् अप्वः प्रति कित्ता २०५ तका दां कुहां वंगु दुसा क्लिन इनर्जी बैंकया शेयरय् ४६/- तका दां थहां वंगु दु। उखे सहयोगी विकास बैंकया शेयरय् नं छुं न्हि न्ह्यःनिसें भाः थहां वनाच्वंगु दु। प्राइम कमर्सियल बैंकं म्हिगः नं दां ल्याखं दकलय् अप्वः छगू करोड चय्खुगू लाख नीन्हय्द्वः तका दांया कारोबार याःगु दु ।
