संसद थौं नं निसें चालीगु
आन्दोलनरत एनेकपा (माओवादीं) ताः ई निसें अवरुद्ध यानावयाच्वंगु व्यवस्थापिका संसदया बैठक बुधवाः निसें चाले बीगु निर्णय याःगु दु ।
माओवादी संसदीय दलया बुधवाः च्वंगु बैठकं संसद चाले बीगु निर्णय यासें आः संसद दुने नं हे आन्दोलन यायेगु नं निर्णय याःगु दु । माओवादी उपाध्यक्ष नाराणकाजी श्रेष्ठ 'प्रकाशं' राष्ट्रपतिया पलाःया विरुद्धया आन्दोलन यथावत दुगु व थुकीयात न्हूगु ढंगं न्ह्यने यंकेगु धयादिसें माओवादीया बैठकं एकतार्फी रुपं संसद चायेकेगु निर्णय याःगु धयादिल ।
माओवादीं ताः ई तक संसद अवरुद्ध जुसाः संविधानसभा विघटन यायेत स्वयाच्वंपिंत हे फाइदा जुइगु निष्कर्ष सहित संसद सुचारु यायेगु निर्णय या:गु खः । माओवादी अध्यक्ष पुष्पकमल दाहाल 'प्रचण्डं' थ्वस्वया न्ह्यः हे सभामुख सुवास नेम्वाङयात थौं नं निसें संसद सुचारु याकेबीगु जानकारी याये धुंकूगु खः ।
वंगु साउन २३ गते निसें माओवादीं नागरिक सर्वोच्चता कायम यायेमाःगु माग यासें संसदया बैठक अवरुद्ध यानावयाच्वंगु खः ।
