संवैधानिक समितिया मतभेद चीकेत निन्हुया ई
प्रमुख स्वंगु दलया शीर्ष नेतात दथुइ जूगु बैठकं संवैधानिक समितिलय् दुगु मतभेद निन्हुया दुने चीकेगु मखुसा: निर्वाचन पाखें निर्णय यायेगु सहमति या:गु दु ।
संविधानसभाया अध्यक्ष सुवास नेम्वाङया कार्यकक्षय् बुधवाः जूगु सहलहलय् निर्धारित ईया दुने हे सहमति जुइ मफुसाः निर्वाचन प्रकृया पाखें बहुमतया निर्णय समितिया निर्णय देयेकेगु सहमति जूगु दु ।
बैठकय् एनेकपा (माओवादी)या अध्यक्ष पुष्पकमल दाहाल 'प्रचण्ड', उपाध्यक्षत डा. बाबुराम भट्टराई व नारायाणकाजी श्रेष्ठ 'प्रकाश', नेता देव गुरुङया उपस्थित जुयादीगु खः । अथेहे नेपाली कांग्रेस पाखें संसदी दलया नेता रामचन्द्र पौडेल, उपनेता प्रकाशमान सिंह व लक्षमण घिमिरे दुगु खःसा एमालेया पाखें अध्यक्ष झलनाथ खनाल, भीम रावल, भीम आचार्य व अग्नी खरेलया उपस्थिति दुगु खः ।
संवैधानिक समितिया सभापति निलाम्बर आचार्यं बहुमतया निर्णययात समितिया निर्णय क्वःछीगु सहमति जूगु कनादिल । समितिया निर्णययात संविधान सभाय् न्ह्यब्वइगु कथं सहलह यानाः दुई तिहाई बहुमतं पास यायेमाःगु प्रावधान दु ।
बैठक लिपाः माओवादी अध्यक्ष प्रचण्डं संवैधानिक समितिल् मिलेमजूगु विषययात थौं व कन्हय् सहमतिया निंतिं सहलह यायेगु व शुक्रवाः क्वःछीगु सहमति जूगु कनादिल । अथेहे कांग्रेस नेता पौडेलं संविधान सभाया कार्यतालिका हेरफेर यायेगु ई आः मदुगुलिं लिप्पांगु पटक जक संशोधन जुइगु जानकारी बियादिल ।
संवैधानिक समितिलय् प्रस्तावित संविधानया नां, राज्यया पुनर्संरचना, राष्ट्रिय चिं, राष्ट्रिय ध्वाँय् लगायत विषयलय् दलत दथुइ मतभेद जुयाः सहमति जुइमफुनी ।
