प्रधानमन्त्री पाखें राष्ट्रपति व कोइराला नाप खँल्हाबंला
प्रधानमन्त्री माधवकुमार नेपालं राष्ट्रपति डा. रामवरण यादव व नेपाली कांग्रेसया सभापति गिरिजाप्रसाद कोइरालायात मंगलवा: नापलाना समसामयिक राजनीतिक अवस्थाया बारे खँल्हाबंला यानादीगु दु ।
राष्ट्रपति भवन शितल निवासय् न्हिनय् प्यताः ईलय् जूगु खँल्हाबंलाय् प्रधानमन्त्रीं थःगु डेनमार्क भ्रमण व असन्न चीन भ्रमणया बारे जानकारी याकादीगु खः । अथेहे वयेकलं वर्तमान राजनीतिक अवस्था व माओवादी लडाकू समायोजन यायेत माओवादीं ग्वाहालि मयागु खँ धयादीगु खः ।
अथेहे प्रधानमन्त्री नापया खँल्हाबंलाय् माओवादीं स्वायत्त गणराज्य घोषणा याःगु बारे राष्ट्रपति यादवं च्यूताः प्वंकादीगु खँ प्रमया राजनीतिक सल्लाहकार रघु पन्तं कनादिल ।
राष्ट्रपतिनापया खँल्हाबंला लिपाः प्रधानमन्त्री नेपाल कांग्रेस सभापतियात नापलायेत कोइरला निवास महाराजगंज थ्यंकादीगु खः । उगु ईलय् नं प्रधानमन्त्री नेपालं सेना समायोजन यायेत माओवादी गम्भीर मजूगु खँ धयादीगु खः । नापं वयेकलं स्वंगू प्रमुख दलया नेतात दुथ्याःगु उच्चस्तरीय राजनीतिक संयन्त्र निर्माण यायेत कोइरालायात इनाप यानादीगु खः ।
कोइरालां राजनीतिक संयन्त्र बारे माओवादी नाप थप सहलह यायेगु धयादिसें न्हापा माओवादी अध्यक्ष नाप जूगु खँल्हाबंलाया बारे प्रधानमन्त्रीयात कनादीगु खः ।
