स्वक्वःगु चरणया आन्दोलन अन्त्यलिसें प्यक्वःगु चरणया आन्दोलन घोषणा
एकीकृत नेकपा माओबादीं राष्ट्रपतिया असवैधानिक पलाया खारेज व नागरिक सर्वोच्चता पलिस्थाया निति न्ह्यानाच्वंगु स्वक्वःगु चरणया आन्दोलन अन्त्यलिसे प्यक्वःगु चरणया आन्दोलन घोषणा याःगु दु ।
येँया न्हू बानेश्वरय् याःगु समापन समारोहपाखें माओवादी नायः प्रचण्डं स्वक्वःगु चरणया आन्दोलन सिधयेवं हे प्यक्वःगु चरणया आन्दोलन न्ह्याःगु घोषणा याःगु खः । वय्कलं थ्वहे पुस १० गतेनिसें माघ १० गतेतक राष्ट्रिय जागरण तथा भण्डाफोर अभियान संचालन यायेगु जानकारी ब्युसें उगु ईतक नं नागरिक सर्बोच्चता कायम मजुसा माघ १० गतेनिसें हे अनिश्चितकालिन आम हड्तालया घोषणा यानादिल ।
स्वक्वःगु चरणया आन्दोलनय् झिंस्वंगु स्वायत्त गणराज्य घोषणा व स्वन्हुया आम हड्ताल याःगु माओवादीं नागरिक सर्वोच्चता कायम मजुतले आन्दोलन मदीकेगु ख्याच्वः ब्युगु खः । स्वक्व:गु चरणया आम हड्तालं समापन न्ह्यः माओवादीं थौं देय्न्यंक जुलुसप्रदर्शन व जनसभा क्वचायेकुगु दु । स्वनिगःया थीथी थासं पिहांवगु जुलुसत बानेश्वरय् केन्द्रीत जुया सभाय् हिउगु खः ।
