''आया याया.. ....'' मचाय्क हाले वइ

नर्मदेश्वर प्रधान

छगू न्हूगु समस्या। श्रीमतीं धाइ। डाक्टर छकः क्यनादिसँ। जिं मतिइ तये। डाक्टरथाय् वनाः जक छु याये। व धाइ। थ्व धाइ। छुं जुइ मखु। जि मवना। मेगु छुं जूगु मखु। वहे दनेबलय् फ्युतुइबलय् ला खः। घौछि तक फताफत न्यासि वने। छुं मजू। दनाः च्वने फु। फ्यतुइ। दने धाःसा थाकु। फ्यतुइ। दने। जि सतर्क जुइ। ई काइ। विस्तार जुइ। काचाक दने फ्यतुइ फइ मखु। थाकुइ। खनी। श्रीमतीं वहे खँ लिसा काइ। छकः क्यनादिसँ धयां ... ... न्यंगु हे मखु ।

पासा आनन्दमान लुमनी। छुं ला न्ह्यः। लँखतं लाइ। पासाया छेँय् जि दुस्वये। पासा तले। सुचं बी। कुहां वइ। तुतिं ज्या मबीधुंकल खनिं। मय्जुं ज्वनाः स्वाहानं क्वय् हइ। नयेफु। खँ ल्हायेफु। स्वास्थ्य ठीक। तर तुति छता मजिउ। पासा गनं वने मफु। छेँया छेँय्। तुति मदुम्ह थें जुया बी। पिने लिसेया सम्पर्क हे त्वःफी। छेँय् लिहां वये। पासाया अवस्था लुमनाच्वनी। जितः नं अथे हे जुइगु खः ला! थ्व समस्या उकिया हे लक्षण खः ला! गबलें गबलें अथे हे जूगु कल्पना लुइ। छेँय् च्वनागु। सुं नापलाये मफुगु। अनुमान जुइ। तर्कनां त्वपुइ। पीडा वोध जुइ ।

श्रीमती नं उलि ल्यासेम्ह मखु। परे जूसा ज्वनाः थहां कुहां गुलि याके फयाच्वनी वं। जि स्वयाः दँ-बदँ जक म्हो उमेरयाम्ह। वयागु जक नं तुति गुलि बल्लाः धकाः। दँ दँ दयेधुंकल पुलिं ज्या मबिउगु। मनूतय्सं धाइ उमेर वंकाः याउँक च्वनेमाः। शान्ति नक्सां। धयां छु याये। उमेर वंकाः हे समस्या वइ ।

थौंकन्हय्। जितः नेता कृष्णप्रसाद भट्टराई लुमना वइ। भट्टराई अविवाहित। ब्याहाः याइपिनि कलाः दइ। मचाखाचा दइ। अय्नं वृद्धा-वस्थाय् इपिं याकः लाइ। कलाः नं मन्त कि ला बुढेसकालय् मां मदुम्ह मचा थें टुहुरा जुइ। तर कृष्णप्रसाद भट्टराईं अभाव सुन्यता फयेम्वाः। यद्यपि व अविवाहित जूसां। थौंकन्हय् जिं मय्जु कपालीयात धन्य खंके। तसकं हे उदार। आदर्शवान। मनूतय्सं खँ ल्हाइ। कुंखिनी। गुंपुन्हिबलय् भाजु भट्टराई व कपालीयात कयाः यक्व व्यंग्य, ख्याः खँ वः। व्यंग्य ब्वनाः जिं नं रस काल जुइ उबलय्। थौंकन्हय् विचारकतय्सं सकारात्मक सोच प्रचारय् हइ। जिं नं सकारात्मक सोच छ्यले। मय्जु कपालीया सेवाया विचाः याये। तःधंगु योगदान थें ताइ। कृष्णप्रसाद भट्टराईजुया हालत कपालीया सेवा मदुगु जूसा छु जुइगु जुइ! व अभावपूर्ति! गुंपुन्हिया व्यंगवाणं पूर्ति याइ ला! थ्व व्यवहारिक प्रश्न खः। थौं समाजय् संरचना हिलाच्वंगु दु। वृद्धवृद्धात समाजय् अलग खने दयाच्वंगु दु। पश्चिमय् थ्व स्थितिइ केयर टेकर अर्थात बिचाः याइम्ह व्यक्ति लहीगु चलन दइ। थज्याःगु चलनं सामाजिक, संस्थागत रुप काइ। झीथाय् नं हिला वनाच्वंगु सामाजिक परिस्थितिइ कपालीपथ, आदर्श प्रथा, दर्शनं यक्व कृष्णप्रसाद भट्टराईपिनि कल्याण जुइ। इलं थ्वयात थुइका हइ। कदर याना हइ। गुंपुन्हिया मनोरञ्जनया विषय जक जुइ मखु कपालीपथ। विश्वास याये ।

उकुन्हु न्हाय्पं स्याइ। मदिक्क हाली। मतिइ लुइ, का जिगु न्हाय्पं खतम! ख्वाँय् ला मजू ला! न्हाय्पं थम्हं हे परीक्षण याये। कर्पिंसं खँ ल्हाःगु ताः ला मताः ला। न्हाय्पं फये। न्यने। रेडियो चीसलं हायेके। न्हाय्पनं गुलित ज्या बिउ स्वये। श्रीमतीयात खासखुस खँ ल्हाके। न्हाय्पनं लाये फु ला कि मफु? स्वये। गबलें ढुक्क जुइ। न्हाय्पनं ज्या बांलाक बिउ। गबलें शंका जुइ। मन क्वतुनी। जितः आः मनूतय्सं ल्हाःभाय् यानाः खँ ल्हाइ। ध्वनिया आनन्द जिं काये फइ मखुत। जिं न्हाय्पनं ताइ मखु। सकसिनं भाय् यानाः गथे खँ ल्हाइ। लुमंके। अनुमानय् तने। दुने। डाक्टर क्यने। वासः तये। न्हाय्पं स्याःगु म्हो जुइ। न्हाय्पनं ताइ। तर अय्नं। छाय् छाय्। ताः ला कि मताः! शंका याये मास्ते वयाच्वनी। गबलें मिखाय् विश्वास तना बी। अखबार ब्वनेत प्लस चस्मा मदयेकं मगायेधुंकल। उमेर वनी। धुन जुइ। गुलिसिनं मिखां मछुया वनी। जि नं मिखा कमजोर जुइ फु। मिखां मछुइफु। मनू म्हमसीफु। दृश्यत तिफ्याये मफयेफु। व्यवहार चले याये थाकुया बी। छकः निकः जिं मिखा तिसी। परे जुइबलय् गय् यानाः समस्याया सामना याये। रिहर्सल याये। जुल कि ला जुल। जुइ न्ह्यः हे बिचाः यायेमाः। माःगु जुक्ति यायेमाः। मिखा तिस्सी। संभावित दृश्य कमजोरीया हाथ्यायात सामना यायेगु दक्षता विकास यायेत स्वये। सः जक न्यनाः, पदचापया आधारय् मनू सु? म्हसीके फइ मफइ। अभ्यास याये ।

दुर्गालाल दाइया ल्हाः खाः। च्वये थाकुइधुंकल। कमल दाइया (डा. कमलप्रकाश मल्ल) ल्हाः खाःगु खं। वय्कःपिं कवि, विद्वान। ल्हाःया खुबिं हे थःगु प्रतिभा क्यनेत सफल जूपिं। ल्हाः खाना बी। च्वयेत मुस्किल जुइ। लेखकयात तुति स्याःसा उलि समस्या मजुइ। कमजोर ल्हातं दुःख बी। लेखन ज्या कुण्ठित जुइ। जि नं अथे हे जूसा! जि विचारय् तने। नुगलय् दासिवःगु भाव गय् पिकाये। गय् च्वये। म्ह पीसे च्वना वइ। म्हुतुं धाये। स्वइतं च्वके। उपायत कल्पना याये। यायां वने ... ...।

रिटायर लाईफ। थौंकन्हय्। ई थज्याःगु हे अनुमान। कल्पना। धुन। तर्कनाय् अप्वः फुनाच्वनी। श्रीमतीं दवाव बी। जि डाक्टरथाय् वने। व्यथा कने। दने फ्यतुइबलय्या समस्या। डाक्टरं न्यनी। तुति उखेथुखे संकी। निष्कर्षय् वइ। मसलया समस्या। झी फ्यतुइगु मसल दु। दनेगु मसल दु। सनेबलय्, प्याखं ल्हुइबलय् बिस्कं बिस्कं मसलं ज्या याइ। ''फ्यतुइगु दनेगु मसल कसे जुल। उकिं हे स्याःगु खः। ठीक जुइ।'' डाक्टरं धाइ ।

डाक्टरया खँ न्यने। स्याःगु कालय्। मसलया परिकारया विश्लेषण। रोमाञ्चक जुइ। कविताया व्याख्या यानाच्वंगु थें ताइ। अमूर्त कलाया अर्थ छ्यानाच्वंगु थें। डाक्टरं धाइ -''वासः नयादिसँ। ठीक जुइ।'' वासः नये।
गुलिसिनं धाइ। उमेरं जूगु। गनं जी! डाक्टरं धयां जी ला! ''जी तिनि'' डाक्टरया बचं लुमनी। शंका जुइ। डाक्टरं ध्वं लाःगु ला मखुला! डाक्टरया आश्वासन। कविताया व्याख्या। अमूर्त कलाया विश्लेषण जक खः ला !

स्याःगु ल्वःमनी। जुरुक्क दनेत स्वये। ''आया याया ...!'' मचायेक हाले वइ ।

More Stories Like this