बन्दया इलय् नेवाः राज्य घोषणाया प्रचारात्मक अभियान
येँ (सन्ध्या टाइम्स)/ एनेकपा (माओवादीं) नीस्वंगु संयुक्त राष्ट्रिय जनआन्दोलन नेपालं स्वन्हुयंकं घोषणा याःगु आम हडतालया दथुइ वइगु पुष ११ गते नेवाःतपाखें याइगु नेवाः स्वायत्त राज्य घोषणा ज्याझ्वःयात कयाः प्रचारात्मक अभियान न्ह्याकाच्वंगु दु ।
ज्यापु समाज यलपाखें न्हियान्हिथं हे यलया पीन्यागू ज्यापु त्वालय् खुल्ला रुपं हे सहलह मुँज्या, कोणसभा थेंज्याःगु ज्याझ्वः यानाच्वंगु दुसा थ्व हे झ्वलय् थौं सुथय् यलया पूर्णचण्डी, च्यासः व सुबाहाः त्वालय् सहलह मुँज्या यात। अथे हे थौं बहनी तःननि, दुपाः, क्वय्लाछि व यलमुल त्वालय् सहलह मुँज्या यायेत्यंगु दु। यलय् म्हिगः बहनी तकया दुने नेवाः ध्वाँय् स्वसःगू तये धुंकूगु दुसा त्वाः त्वालय् नं ब्यानर तयेगु ज्या जुयाच्वंगु खँ ज्यापु समाजं धाःगु दु ।
थ्व हे झ्वलय् नेवाः स्वायत्त राज्य घोषणा ज्याझ्वलय् ब्वति कायेकेगु निंतिं ज्यापु महागुथिं येँया ख्वीस्वगू ज्यापु त्वाःया प्रतिनिधितय्गु दथुइ सहलह ब्याकूगु दु। उगु सहलह ज्याझ्वलय् सभासद् नापं नेपाली कांग्रेसया नेता तीर्थराम डंगोल, माओवादीया नेता सर्वोत्तम डंगोल व ज्यापु महागुथिया नायः विपेन्द्र महर्जनं न्ववानादीगु खः।
उगु हे कथं नेवाः स्वायत्त राज्य मंकाः परिषद किपूया ग्वसालय् म्हिगः हे बहनी किपूया कुतुझ्वः त्वालय् सभा जुल। उगु सभाय् सभासद् दिलिप महर्जन, नेपाली कांग्रेसया बद्रिलाल महर्जन नापं थीथी वक्तातय्सं नुगःखँ प्वंकादीगु खः ।
