झिम्हेस्यां मंकाः कथं घोषणा याइगु

येँ (सन्ध्या टाइम्स)/पुष ११ गते दशरथ रंगशालाय् घोषणा यायेत्यंगु नेवाः स्वायत्त राज्ययात नेवाः स्वायत्त राज्य मंकाः संघर्ष समितिइ दुथ्यानाच्वंगु झिगू हे संगठनया नायःतय्सं मंकाः कथं घोषणा याइगु जूगु दु। नेवाः स्वायत्त राज्य मंकाः संघर्ष समितिया म्हिगः च्वंगु मुँज्यां नेवाःतय्गु मंकाः ध्वाँय् नं झिम्हेस्यां मंकाः कथं ब्वयेकेगु खँ क्वःछिउगु दु। अथे हे उगु घोषणासभाय् राजनीतिक पार्टीयात पौ छ्वयाः प्रतिनिधि पाहां कथं दलया नेतातय्त ब्वनेगु खँ नं क्वःछिउगु दु। नेवाः राज्यया लागा कथं ऐतिहासिक नेपालमण्डल लागा दुनेया त्रिशुलिंनिसें दुधकोशी तकया नेवाः बाहुल्य दुगु गां व वडायात तकं दुथ्याकेगु सैद्धान्तिक अवधारणा न्ह्यब्वइगु जूगु दु ।