राज्य पुनर्संरचनाया मस्यौदा तयार

येँ (सन्ध्या टाइम्स)/संविधानसभा राज्य पुनर्संरचना नापं राज्यशक्ति बाँडफाँड समितिं राज्य पुनर्संरचनाया मस्यौदा तयार यायेधुंकूगु दु। उगु मस्यौदायात कयाः कंस ९ गतेनिसें सहलह ब्याकीगु जूगु दु। मस्यौदाय् प्रदेशतय्गु नां व प्रदेशया लागाया विषययात कयाः छुं नं मच्वसे खाली यानातःगु दु।
सछि व गुक्वःगु मुँज्या कंस च्वनाः अबलय्निसें हे प्रदेश व प्रदेशया लागायात कयाः सहलह ब्याकेगु खँ समितिया नायः नापं सभासद् लोकेन्द्र विष्टमगरं 'सन्ध्या टाइम्स'यात कनादीगु दु। वय्कलं मुँज्याय् हे सहलह ब्याकाः प्रदेशया नां व लागा नापं अग्राधिकारया खँ क्वःछीगु जुइ धकाः नं धयादीगु दु। आः तक नं सहमतिया आधारय् वनाच्वनागु दु धयादिसें मगरं यदि प्रदेश, प्रदेशया लागा नापं अग्राधिकारया खँय् सहमति मजुल धाःसा फरक मत नापं तयाः मस्यौदायात अन्तिम रुप बीगु खँ नं धयादीगु दु ।