वाणिज्यया कारोबारं नेप्से क्वय्
येँ (सन्ध्या टाइम्स)/नेपाल स्टक एक्सचेन्जय् जूगु शेयर कारोबारं थ्व वालय् लगातार निन्हुया न्हि कुन्हु नं नेप्से परिसुचक कुहां वंगु दु। शेयर बजाः चालेवं शुरुया छुं ई तक सामान्य जूगु नेप्से परिसुचक वयां लिपा तसकं सामान्य जक अंकं थहां वनेगु धुंकूगु खःसा अनंलि बजाः चाःगु करीब बाघौ लिपा नेप्से परिसुचक कुहां वनेगु क्रमं निरन्तरता कायेवं थ्व क्रमं कारोबारया अन्त तकं कायम जुल। थ्व क्रमय् परिसुचक तःक्वःमछिं थहां कुहां जुयाः अस्थिर जुयाच्वंगु खः ।
म्हिगःया कारोबारय् नेप्से परिसुचक थहां कुहां जुइगुली दकलय् अप्वः भुमिका दुगु वाणिज्य समुहया कारोबार कुहां वनेवं नेप्से परिसुचक नं कुहां वंगु खः। मेमेगु समुहया सुचक व कारोबार थहां वंसां वाणिज्य समुहया कारोबार कुहां वनेव. नेप्से परिसुचक नं १ दशमलव ७५ अंकं कुहां वनाः ५३६ दशमलव ९३ अंकय् थ्यंगु दु। सेन्सेटिभ शुन्य दशमलव ८६ अंकं कुहां वनाः १३२ दशमलव ४ अंकय् थ्यंगु दु। फ्लोट नं शुन्य दशमलव २४ अंकं कुहां वना ५१ दशमलव शुन्य १ अंकय् थ्यन ।
कारोबार जूगु समुह मध्ये कुहां वःगु छगू जक उपसुचक वाणिज्य समुह ३ दशमलव ५९ अंकं कुहां वनाः ५११ दशमलव ३१ अंकय् थ्यंगु दु। उखे छन्हु न्ह्यःया कारोबारय् कुहां वःगु मेगु दक्वं समुहया सुचक थहां वंगु दु। विकास बैंक समहु दकलय् अप्वः २ दशमलव ९४ अंकं थहां वनाः ५८६ दशमलव १८ अंकय् थ्यन। वाणिज्य धुंकाः जलविद्युत समुह २ दशमलव ४४ अंकं थहां वनाः ७९२ दशमलव २ अंकय् थ्यंगु दु ।
अथे हे फाइनान्स समुह शुन्य दशमलव ९२ अंकं थहां वनाः ५६२ दशमलव शुन्य ७ अंकय् थ्यंगु दुसा इन्स्योरेन्स समुहया छगू नं कित्ता शेयर कारोबार मजुल। उखे उत्पादन व व्यापारिक समुहया कारोबार जूसां हिउपाः धाःसा वःगु मदु ।
स्टक एक्सचेन्जया कथं शेयर कारोबार जूगु पीन्हय्गू कम्पनी मध्ये झिंगुंगू कम्पनीया शेयर भाः थहां वंगु दुसा झिंगुंगू हे कम्पनीया भाः कुहां वःगु दु। गुंगू कम्पनीया भाः जक यथावत हे जुल। थ्व ल्याखं शेयर बजारय् न्हय्स्वद्वः व न्यासः व पीप्यंगू कित्ता शेयर न्याये-मी जुयाः प्यंगू करोड झिंन्हय्गू लख स्वीस्वद्वः तका दांया कारोबार जूगु दु। ऐनकपा माओवादीया लगातार बन्दया कारणं नं दांया कारोबार म्हो जक जूगु खँ स्टक एक्सचेन्जं जानकारी बिउगु दु ।
म्हिगःया कारोबारय् गोर्खा डेभलपमेण्ट बैंक शेयरय् प्रति कित्ता ४९/-, एसबीआई व स्टायण्डर्ड चार्टर्ड शेयरय् ४८/-, नबिल बैंक ३०/- व एभरेष्ट बैंकया शेयरय् ३५/- तका दां कुहां वःगु दु। उखे क्लिन इनर्जीया शेयरय् दकलय् अप्वः ५७/- तका दां प्रति कित्ता शेयरय् थहां वंगु दु। म्हिगः नं प्राइम कमर्सियल बैंकं दकलय् अप्वः निगू करोड स्वीखुगू लख पीन्याद्वः तका दांया कारोबार याःगु दु। सहयोगी विकास बैंकं अप्वः कमे याःगु दुसा गोर्खा डेभलपमेण्ट बैंकं अप्वः द्यापं फःगु दु ।
