आः दिल्ली नाप वार्ता यायेगु : प्रचण्ड

प्यंगूगु चरणया आन्दोलनया ज्याझ्व: सार्वजनीक

एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' नेपाली कांग्रेस, नेकपा (एमाले) सहितया सरकार नाप याःगु वार्ता असफल जुयावंगुलिं आः तप्यंक भारत नाप वार्ता यायेगु धयादिल । वयेकलं दलत नापया वार्ताय् नेतातय्सं न्ह्यावलें दिल्लीया ख्वाः स्वयाः सहमति यायेमफुगुलिं आः भारत नाप वार्ता यायेगुया विकल्प मदुगु धयादिल ।

माओवादीया स्वंगूगु चरणया लिप्पांगु न्हि व स्वन्हुन्यंक आम हड्तालया नं लिप्पांगु न्हि न्हू बानेशवरय् याःगु आमसभायात सम्बोधन यानादिसें वयेकलं धयादिल, - 'कांग्रेस नाप वार्ता यानाः, छुं सहमति मजू । एमाले नाप वार्ता यानाः, छुं मवः । प्रधानमन्त्री नाप खँल्हानाः, छुं जुइमखु ।'

'गुकथं ज्ञानेन्द्रया शासनकालय् प्रतिगमन बच्छि सच्चेजुल धकाः सरकारय् वंपिंयात झिसं नोकर नाप मखु मालिक नाप वार्ता याये धयागु खः, अथेहे यानाः आः कतामरीनाप मखु भारत नाप वार्ता जुइ । झी भारत नाप वार्ता यायेत तयार दु ।'

प्रधानसेनापति प्रकरणय् राजीनामा बीवं विदेशी प्रभुया बारे खँ न्ह्यथंनादीम्ह प्रचण्डं सम्बोधनया झ्वलय् भारतया हे नां कयाः न्ववानादीगु थ्व न्हापांगु अवसर खः ।

अथेहे वयेकलं कालापानी पाखें भारतीय सेनी चीकेमाःगु, दक्वं सीमा समस्या समाधान जुइमाःगु, अन्तर्राष्ट्रिय मान्यता कथं न्हूगु पारवाहन सन्धि जुइमाःगु नं धयादिल । वयेकलं आः नेपाःयात रोबोट पाखें चले यायेगु म्हगस मखंकेत ख्याच्वः बियादिसें माओवादी कांग्रेस, एमाले वा सुर्यबहादुर थें मजूगु धयादिल । वयेकलं माओवादीयात नं अथे यानाः चले यायेत स्वसाः माओवादी वनाप ल्वायेत तयार जूगु धयादिल ।

भारतया सेनापति दीपक कपुरं नेपाःया प्रधानसेनापति छत्रमानिसंह गुरुङयात नापलानाः शान्ति सम्झौता विरुद्ध सेना समायोजन मयायेत ब्यूगु सुझाव प्रति आक्रोश प्वंकादिसें माओवादी अध्यक्ष प्रचण्डं धयादिल, - 'भारतया सेनापतिं नेपाःया विस्तृत शान्ति सम्झौता विपरीत सार्वजनिक रुपं न्ववाये ज्यूलाः ? छु व नेपाःया गभर्नर खलाः ?

आमसभाय् माओवादी अध्यक्षं प्यंगूगु चरणया आन्दोलनया ज्याझ्व: नं थौं हे घोषणा यानादिल । ज्याझ्व: कथं पुस १० गते निसें माघ १० गते तक राष्ट्रिय जागरण व भन्डाफोर अभियान, माघ १० गते तक नं राष्ट्रपतिया असंवैधानिक पला: भिंकेगु ज्या मजूसा: व राष्ट्रिय सरकार गठन यायेगु पाखे बिचा: मयासा: माघ १० गते निसें अनिश्चितकालीन आमहड्ताल यायेगु घोषणा या:गु दु ।

सभायात सम्बोधन यानादिसें माओवादी उपाध्यक्ष डा. बाबुराम भट्टराईं सुगौली सन्धि निसें सन् १९५०या सन्धि मभिंकूतल्ले नेपा: सार्वभौम सम्पन्न जुइ मफइगु धयादिल । वयेकलं आ: आवश्यक जूसा: लेण्डुप पथविरुद्ध ल्वायेत तयार दुगु धायादिसें आ: देय् दुनेया दलालनाप जक मखु, विदेशी प्रभुत नाप नं ल्वायेमा:गु ई वयेत्यंगु धयादिल ।

वयेकलं आन्दोलनयात शान्तिपूर्ण दयेकेत ग्वाहालि या:गुलिं प्रहरीयात सुभाय् नं बियादिल ।

ज्याझ्वलय् माओवादी नेतात नेत्रविक्रम चन्द 'विप्लव', हितमान शाक्य, नेतृ हिसीला यमी लगायतं नागरिक सर्वोच्चताया माग पू मवंतल्लत आन्दोलन न्ह्यानाच्वनीगु धयादिल ।

अथेहे बानेश्वरय् याःगु सभाय् नेकपा (एमाले) नाप आवद्ध जनवर्गिय संगठन अखिल नेपाल किसान संघया केन्द्रीय न्वकु धर्म दत्त देवकोटा मादोवादीइ प्रवेश यानादीगु दु । वयेकलं नेपाली क्रान्ति पुरा यायेत व जनवादी क्रान्ति तालाकेत मेगू छु नं पार्टीं मफइगु जुइवं थः एमाले त्याग याना माओवादीइ दुहाँवइगु धयादिसें थःगु योग्यता व क्षमतां फत्तले ज्या यायेगु धयादिल ।