आम हड्ताल क्वचाल
एकीकृत नेकपा (माआवादीं) आह्वान याःगु स्वन्हुन्यंकया आम हड्ताल मंगलवाः न्हिनय् निसें क्वचाःगु दु । हड्ताल सिधेवं सतकय् सवारी साधन चले जुइ शुरु जूगु दुसाः बजाः नं चालेगु शुरु जूगु दु ।
राष्ट्रपतिं प्रधानसेनापतियात थमौति ब्यूगु पलाः भिंकेमाःगु व नागरिक सर्वोच्चता कायम यायेमाःगु माग यासें स्वंगूगु चरणया लिप्पांगु ज्याझ्वः कथं माओवादीं आइतवाः निसें स्वन्हुन्यंक आम हड्तालया आह्वान याःगु खः ।
बन्दया स्वन्हुया न्हि न्हापांगु निन्हुया स्वयां तुलनात्मक रुपं शान्त जूगु खः । माओवादीं न्हिनय् झिंनिताः ई तक जक आम हड्तालया घोषणा याःगुलिं माओवादी कार्यकर्तातय् मंगलवाः सुथंनिसें हे देय्या थीथी थासय् प्रदर्शन यानाः नागरिक सर्वोच्चता स्थापना यायेत माग याःगु खः । अथेहे गुलिखें थासय् सोमवाः थें प्रदर्शनकारीतय्सं सांस्कृति ज्याझ्वः यानाः विरोध प्रदर्शन याःगु खः ।
आम हड्ताल लिपाः देय्या थीथी थासं जुजुल पिथनाः आमसभा याःगु खः । स्वनिगलय् नं येँ, यल व ख्वपःया थीथी थासं जुलुस पिथनाः न्हू बानेश्वरय् छगू सभा याःगु खः । सभायात माओवादी अध्यक्ष पुष्पकमल दाहाल 'प्रचण्डं' सम्बोध यानादिसें नागरिक सर्वोच्चता दिल्ली थ्यंगुलिं आः दिल्ल नाप वार्ता यायेगु धयादिल । अथेहे सभाय् प्यंगू चरणया आन्दोलनया ज्याझ्वः नं सार्वजनीक याःगु खः ।
