'आम हड्ताल कन्हय् झिंनिताः ई तक जक'
एकीकृत नेकपा (माओवादीं) स्वंन्हुन्यंक घोषणा याःगु आम हड्ताल मंगलवाः झिंनिताः ई तक जक याइगु जूगु दु । माओवादीः नीस्वंगु संयुक्त राष्ट्रिय जनआन्दोलन समिति नेपालया अध्यक्ष डा. बाबुराम भट्टराईं सोमवाः सनिलय् छगू विज्ञप्ति पिथनाः मंगलवाः झिंनिताः ई तक जक आम हड्ताल यायेगु व लिपा देय्न्यंक जुलुस प्रदर्शन यायेगु व आमसभा लिपा स्वंगूगु चरणया आन्दोलन क्वचाइगु खँ धाःगु दु ।
राष्ट्रपतिं प्रधानसेनापतियात थमौति ब्यूगु पलाः भिंकेमाःगु व नागरिक सर्वोच्चता कायम यायेगु माग यासें माओवादीं आइतवाः निसें स्वंन्हुन्यंय आम हड्ताल यानाच्वंगु खः । हड्ताला लिप्पांगु न्हि मंगलवाः स्वनिगःया येँ, यल व ख्वपःया थीथी थासं जुलुस पिकयाः न्हिनय् छताः ईलय् न्हू बानेश्वरय् आमसभा याइगु व उगु आमसभायात अध्यक्ष पुष्पकमल दाहाल 'प्रचण्ड' लगायत नेतातय्सं सम्बोधन याइगु ज्याझ्वः दु ।
अथेहे विज्ञप्तिइ हड्तालया निन्हुया न्हि देय्न्यंक शान्तिपूर्ण रुपं सम्मन्न जूगु खँ न्ह्यथंनातःगु दु ।
