हड्तालया निन्हूया न्हि नं जनजीवन प्रभावित
एकीकृत नेकपा (माओवादीं) स्वन्हून्यंक याःगु आम हड्तालया निन्हूया न्हि नं देय्न्यंक जनजीवन प्रभावित जूगु दु । माओवादी कार्यकर्तातय्सं देयन्यंक हे सुथंनिसें सतकय् टायर च्याकाः प्रदर्शनय् कुहांवःगु खः । बन्दया कारणं देय्न्यंया सवारी अवगमन ठप्प जूगु दुसाः व्यापार व्यवसाय नं ठप्प जूगु दु ।
बन्दया निन्हूया न्हि न्हापांगु न्हिस्वयां शान्त जूगु दु । आइतवाः तनावग्रस्त जूगु येँया न्हू बानेश्वर लगायत थासय् माओवादी कार्यकर्तातय्सं सुथंनिसें हे प्रदर्शन याःगु खः । न्हिनय् माओवादीं बानेश्वरय् छगू सभा याःगु खः । उगु सभाय् माओवादी उपाध्यक्ष डा. बाबुराम भट्टराईं सम्बोधन यानादीगु खःसा माओवादी नेतृ हिसिला यमी लगायत नेतात कार्यकर्तात नाप म्येँ हालाः व प्याखँ ल्हुया: विरोध प्रदर्शन याःगु खः ।
बन्दया निन्हूया न्हि सोमवाः गृह प्रशासनं न्हापांगु न्हि स्वयां अप्व सुरक्षा परिचालन याःगु खः । सिंहदरवार निषेधित क्षेत्र सुरक्षाया निंतिं न्यागू तहलय् सुरक्षाकर्मी परिचालन याःगु खः । गृह मन्त्रालयं बन्दया झ्वलय् जवरजस्ती यायेत स्वःपिं झिम्ह प्रदर्शनकारीतय्त सोमवाः प्रहरीं येँ नं ज्वंगु खँ धा:गु दु ।
अथेहे बन्दया झ्वलय् स्वनिगलं पिने दाङय् माओवादी कार्यकर्तातय्सं बन्दया अवज्ञा याःगु धासें काष्ठ उद्योग, छगू कोचिङ सेन्टर व थीथी सरकारी ज्याकूथी तोडफोड याःगु दु । अथेहे बुटवलय् नं निगू सरकारी ज्याकू व छगः गाडी तोडफोड याःगु दु ।
नापं बैतडी, सिन्धुली, पाल्पा, नारायणगढ, सप्तरी, पोखरा, वीरगंज, दोल्खा, काभ्रे लगायत देय्या थीथी थासय् नं माओवादीं सुथंनिसे प्रदर्शन याःगु खः । न्हापांगु न्हि स्वयां प्राय दक्वं जिल्लाया अवस्था शान्त खनेदुगु खः । आपलं थासय् प्रदर्शनकारीतय्सं सरकार विरोधी म्येँ हालाः व प्याखँ ल्हुया विरोध प्रदर्शन याःगु खः ।
