माओवादी हड्ताल हिंसात्मक जूगु सरकारया ठहर
सरकारं माओवादीया आम हड्ताल हिंसात्मक जूगु निष्कर्ष पिकासें शान्ति सुरक्षा कायम यायेत छुं सम्झौता मयायेगु खँ धाःगु दु ।
बन्दया निन्हू सोमवाः सिंहदरवारय् उपलब्ध उपप्रधानमन्त्री विजयकुमार गच्छदार, गृहमन्त्री भीम रावल लगायत मन्त्रीतय् अनौपचारिक बैठकं शान्ति सुरक्षा कायम यायेत दक्वं सुरक्षा निकाययात निर्देशन नं ब्यूगु दु ।
बैठकं आम हड्तालं शान्ति सुरक्षाय् खलल लाकूगु निष्कर्ष पिकासें निन्हुया न्हिया हड्तालया नं समिक्षा याःगु खः । शान्ति सुरक्षा कायम यायेगु सरकारया प्रमुख दायीत्व जूगुलिं उकी छुं सम्झौता मयायेगु निर्णय नं बैठकं याःगु दु ।
बैठकं लिपा पत्रकारत नाप खँल्हाबंला यानादिसें उपप्रम गच्छदारं कानुन उल्लंघन याइपिं न्ह्याम्हेसित नं कडा कारवाही यायेगु धयादिल । वयेकलं आइतवाःया प्रदर्शन शान्तिपूर्ण जुइगु आशाय् सरकारं अधिकतम संयम नालाकाःगु धयादिसें तर प्रदर्शन हिंसात्मक जूगुलिं सोमवाः निसें सरकार कडा रुपं प्रस्तुत जुइगु धयादिल ।
