आन्दोलन मत्याःसाः संविधानसभा भंग जुइ : भट्टराई
एकीकृत नेकपा (माओवादी)या उपाध्यक्ष डा. बाबुराम भट्टराईं आःया आन्दोलन त्याके हे माःगु खँ धयादीगु दु । संविधानसभा भंग यायेगु षड्यन्त्रय् दलत लगे जुयाच्वंगु द्वपं बियादिसें वयेकलं आन्दोलन मत्याःसाः संविधानसभा भंग जुइगु ठोकुवा यानादिल ।
आम हड्तालया निन्हुया न्हि सोमवाः न्हू बानेश्वरय् याःगु कोणसभायात सम्बोधन यानादिसे वयेकलं धयादिल, - 'थ्व आन्दोलन झिसं मत्याकूसाः संविधानसभा भंग जुइ, उकीं झिसं संघर्ष त्याके हे माः ।'
संयुक्त जनआन्दोलन समिति नेपालया अध्यक्ष नापं जुयादिम्ह भट्टराईं १४ जेठ तक संविधान निर्माण मजूसाः राष्ट्रपतिय शासनया लागू यायेगु षड्यन्त्र जुयाच्वंगु धयादिल । वयेकलं संविधानसभा भंग जूसाः सरकार व राष्ट्रपति उगु हे ईलय् समाप्त जुइगु नं धयादिल । वयेकलं वयां लिपाः जनतां सतकं संविधान जारी याइगु नं दाबी यानादिल ।
हड्तालया न्हापांगु न्हि तनावग्रस्त जूगु न्हू बानेश्वरय् माओवादीं सोमवाः कोणसभा याःगु खः । सभाय् भट्टराईं ल्यंदनीगु हड्तालया ज्याझ्वः लितमकायेगु स्पष्ट यानादिल । वयेकलं आम हड्तालया लिप्पांगु न्हि मंगलवाः न्हू बानेश्वरय् अध्यक्ष प्रचण्डं सम्बोधन यानाः स्वंगूगु चरणया आन्दोलन क्वचाइगु व प्यंगूगु चरणया आन्दोलन न्ह्याकीगु धयादिल ।
