थ्व वाःया न्हापांगु न्हि नं नेप्से क्वय्
येँ (सन्ध्या टाइम्स)/ थुगु वाःया शुरुइ नं नेपाल स्टक एक्सचेन्जय् जूगु शेयर कारोबारं नेप्से परिसुचक कुहां वंगु दु। म्हिगःया कारोबारय् नं बजाः परिसुचक व काराबेर निगुलिं कुहां वंगु दु। कारोबार शुरु जूगु करीब घौछि तक सामान्य स्थितिइ लानाच्वंगु नेप्से परिसुचक वयां लिपा सामान्य अंकं थहां वंगु खःसा वया लिपा हाकनं कुहा वनेगु क्रमं निरन्तरता काःगु खः। स्टक एक्सचेन्जया कथं शेयर कारोबारं नेप्से गाक्कं थहां कुहां जुइगु क्रमं निरन्तरता कयाच्वंगु खः। नेप्से थहां कुहां वनेगु क्रमं निरन्तरता कायेवं कारोबारया अन्तपाखे सामान्य अंकं कुहां वंगु खः ।
स्टक एक्सचेन्जया कथं नेप्से कुहां वनेगु क्रमं निरन्तरता कायेवं म्हिगःया शेयर कारोबारं शुन्य दशमलव ५३ अंकं कुहां वनाः ५३८ दशमलव ६८ अंकय् थ्यंगु दु। सेन्सेटिभ नं शुन्य दशलमव २८ अंकं कुहां वःगु दुसा फ्लोट इन्डेक्स शुन्य दशमलव शुन्य ८ या सामान्य अंकं कुहां वल ।
परिसुचकया लिसे कारोबार नं कुहां वयेगु झ्वलय् स्टक एक्सचेन्जय् जूगु कारोबारय् उपसुचकया कारोबारय् वाणिज्य समुहया सुचक शुन्य दशमलव ३२ अंकं कुहां वनाः ५१४ दशमलव ९ अंकय् थ्यंगु दु। विकास बैंक समुह २ दशमलव ३८ अंकं कुहा वनाः ५८३ दशमलव २४ अंकय् थ्यन। फाइनान्स समुहया सुचक नं शुन्य दशमलव ४९ अंकं कुहां वयेवं ५६१ दशमलव १५ अंकय् थ्यंगु दु। कारोबार जूगु उपसुचकय् दकलय् अप्वः जलविद्युत समुहया सुचक ३ दशमलव ३७ अंकं कुहां वयेवं ७८९ दशमलव ७६ अंकय् थ्यंगु दु। उखे स्टक एक्सचेन्जया कथं वीमा समुहया छगू जक उपसुचक शून्य दशमलव २५ अंकं थहां वनाः ५७२ दशमलव ६२ अंकय् थ्यंगु दुसा म्हिगःया शेयर बजारय् होटल व व्यापारिक समुहपाखे छगू कित्ता शेयर न्याये-मी मजुल। थुगु वाःया न्हापांगु न्हि नेपाल स्टक एक्सचेन्जय् न्यय्न्हय्गू न्हय्न्हय्द्वः व न्हय्सः व नीन्यागू कित्ता शेयर न्याये-मी जुयाः मुक्कं प्यांगू करोड नीछगु लाख चय्द्वः तका दांया कारोबार जूगु दु। शेयर कारोबार जूगु कम्पनीया भाः कुहां वनेगु झ्वलय् नीप्यंगू कम्पनीया भाः कुहां वंगु दुसा नीगू कम्पनीया भाः थहां वंगु दु। मेखे झिंस्वंगू कम्पनीया शेयर भाः थातं लाःगु दु ।
शेयर कारोबार जूगु कम्पनीमध्ये दकलय् अप्वः कास्की फाइनान्स लिमिटेडया शेयरय् प्रति कित्ता ४२/- व स्टायण्डर्ड चार्टर्ड बैंकया शेयरय् प्रति कित्ता ३०/- तका दां थहां वंगु दुसा उखे नेपाल एसबी आई बैंकया शेयरय् दकलय् अप्वः प्रति कित्ता शेयरय् ७६१/- दां कुहां वयेवं थुगु बैंकया शेयर ८६६/- तकाय् सीमित जूगु दु। अथे हे एभरेष्ट बैंकया शेयरय् नं ५५/- तका दां कुहां वःगु दु ।
प्राइम कमर्सियल बैंकं दांया ल्याखं दकलय् अप्वः निगू करोड झिंनिगू लाख चय्छद्वः तका दांया कारोबार याःगु दु। कास्की फाइनान्सं दकलय् अप्वः कमे याःगु दुसा यूनियन फाइनान्सं दकलय् अप्वः द्यापं फःगु दु ।
