गाजाय् इजरायलया नृशंस आक्रमण

इजरायल-प्यालेस्टाइन ल्वापुया न्हूगु श्रृंखला कथं थौंकन्हय् इजरायली सेनां प्यालेस्टीनी लागाय् लाःगु गाजा क्षेत्रय् हवाई आक्रमण यानाच्वंगु दु । उगु आक्रमणय् लानाः करिब प्यसःम्ह मनूया ज्यान वनेधुंकूगु दुसा विश्व समुदायं हे उकिया विरोध यानाच्वंसां नं आक्रमण जारी हे यानाच्वंगु दु । इजरायलया थ्व यकःति नृशंस आक्रमणयात न्ह्याक्व आलोचना याःसां मगाः । गाजा लागाय् तयातःगु हमासया ज्याकू ध्वस्त यायेगु नामय् थ्व आक्रमण जुयाच्वंगु दु गुकी आः तक हमासया छम्ह हे कार्यकर्ता मलाःगु बरु सर्वसाधारण मनूत जक सिनाच्वंगु खँ वयाच्वंगु दु ।

इजरायलं याःगु थ्व आक्रमणं विश्वय् वयागु दादागिरि हानं छक्वः सार्वजनिक जूगु दु । इजरायलपाखें सयौं मनूत सिक्क आक्रमण यातं नं अमेरिका सुम्क च्वनाच्वंगु धाःसा अजूचायापुगु विषय जूगु दु । रुसं जर्जियाय् निन्हु आक्रमण याःबलय् अमेरिकां निगू देय्या स्वापू स्यनेफु धकाः ख्याच्वः बियाहःगु खः । थौं इजरायलं न्यान्हु तक लगातार आक्रमण यानाच्वनं नं अमेरिकां वयात छुं धाःगु मदुनि । इजरायलं यानाच्वंगु थ्व आक्रमण मदिकल धाःसा मध्यपूर्वय् हानं छक्वः शान्तिया स्थिति स्यनीगु खतरा पिहां वयेफु । खतुं मध्यपूर्वया स्थिति न्हापा थें तनावपूर्ण मखयेधुंकल । इराक युद्ध लिपा अन अमेरिकाया प्रभाव गाक्कं बल्लाये धुंकल । उकिं आःया स्थितिइ न्हापाया थेंज्याःगु तनाव पिहां मवयेफु । तर राज्यस्तरं थुकिया विरोध मजूसां आतंकवादी शैलीं विरोध जुइगु खतरा ब्वलनेफु । थ्व ग्यानापुगु अवस्था खः । आः गाजाय् जुयाच्वंगु आक्रमण दिकेत विश्वं गुलि फु उलि याकनं पहल यायेमाःगु आवश्यकता दु ।

More Stories Like this