नेवाः स्वायत्त राज्य निर्माणय् इन्जिनीयरतय्गु भूमिका
येँ (सन्ध्या टाइम्स)/नेवाः इन्जिनीयर पुचःया ग्वसालय् वंगु शनिवाः नेवाः स्वायत्त राज्य घोषणा बारे सहलह ब्याकेत 'नेवाः स्वायत्त राज्यय् प्राविधिकपिनिगु भूमिका' विषयक अन्तर्क्रिया ज्याझ्वः तःजिक जुल ।
नेवाः इन्जिनीयर पुचःया नायः इन्जिनीयर वीरेन्द्रमान शाक्यं लसकुस न्वचु बीगु झ्वलय् उगु ज्याझ्वलय् नेवाः इन्जिनीयर पुचः नीस्वनाया उद्देश्य बारे कनादिसें पौष ११ गते जुइगु घोषणाय् प्राविधिकपिनिगु भूमिका छु जुइमाः थुइकाः इलय् हे संलग्न जुयाः ज्या न्ह्याकेत सहलह मुँज्या यानाच्वनागु खँ कनादिल।
मुँज्याय् नेपाः राष्ट्रिय पार्टीया नायः डा. केशवमान शाक्यं पोलिटिक्स व टेक्नोलोजी नाप निकतम स्वापू दुगुलिं प्राविधिकपिनि भूमिका राज्य निर्माणया ज्याखँय् तसकं महत्वपूर्ण जूगु खँ कनादिल ।
नेवाः स्वायत्त राज्य मंकाः संघर्ष समितिया दुजः मल्ल के. सुन्दरं इन्जिनीयर/प्राविधिक सकसितं थ्व हे पौष ११ गतेया ज्याझ्वलय् अधिकतम सहभागी जुइत इनाप यासें राज्य पुनसंरचनाया ज्या जुयाच्वंगु इलय् 'नेवाः स्वायत्त राज्य' छाय् माःगु धइगु बारे स्पष्ट यानाः वकुन्हु नेवाःतय्गु अभिमत क्यनेमाःगु खँय् बः बियादिल ।
नेपाली कांग्रेस येँ जिल्ला समितिया उपसभापति प्रा. भिमसेन दास प्रधानं नेपाली कांग्रेसया दुने नं 'नेवाः स्वायत्त राज्य' जुइमाःगु खँय् मजिउ धाये मफये धुंकूगु खँ कनादिसें थ्व घोषणा यायेगु लागिं थीथी राजनीतिक बिचाः दुपिं सकलें छधी छपाँय् जुयाः न्ह्याः वनाच्वनागु खँ कनादिल ।
नेकपा (एमाले) या सभासद् डा. मंगलसिद्धि मानन्धरं स्वायत्त राज्य धइगु छु अले नेवाः स्वायत्त राज्य छाय् माःगु धइगु बारे कनेगु नापं झीत फायेत न्ह्यागु हे षडयन्त्र जूसां 'नेवाः स्वायत्त राज्य' अवश्य सफल जुइगु खँ कनादिल ।
एकीकृत नेकपा (माओवादी) या सभासद व आर्किटेक्ट हिसिला यमिं नेवाःत धइपिं न्हापांनिसें शहरीकरण यानाः देश दयेकेगु ज्या याना जुइपिं खःसां राजनीतिक सचेतना मवःतले झी न्ह्याः वने मफइगुलिं जातीय स्वायत्त राज्य माःगु बिचाः प्वंकादिल।
सहलह मुँज्याय् अथे हे सछिम्ह इन्जिनीयरत सहभागी जूगु खः। उगु हे ज्याझ्वलय् पौष ११ गतेया ज्याझ्वःया लागिं सकसियां स्वेच्छिक रुपं बियादीगु आर्थिक ग्वाहालि कथं ५०,०००/- तका दां नं मंकाः संघर्ष समितिया अर्थ उपसमितिया संयोजक वीरेन्द्रभक्त श्रेष्ठयात लःल्हायेगु ज्या जूगु खः। पौष ११ गते कुन्हु नेवाः इन्जिनीयर पुचलं ब्यानर हे ज्वनाः ब्वति काइगु जूगु दु ।
