तण्डुकार समाजया निर्णय
यल (सन्ध्या टाइम्स)/यल झतापोलया सांस्कृतिक सतलय् नेपाल तण्डुकार समाजया मुँज्या च्वन। नेपाल कम्युनिष्ट पार्टीया संस्थापक नेता नरबहादुर कर्माचार्यया प्रमुख आतिथ्यय् न्ह्याःगु उगु ज्याझ्वलय् सकलें नेवाः तण्डुकार जाति छप्पँ जुयाः नेवाः स्वायत्त राज्य घोषणा ज्याझ्वलय् ब्वति कायेगु अले उगु ज्याझ्वःयात तिबः बीगु खँ न्ह्यथंगु दु ।
थौं नेवाः दक्व छप्पँ जुयाः न्हूगु नेपाःया संविधानय् नेवाः स्वायत्त राज्यया प्रत्याभूति कायेत न्ह्यचिले माःगु बः बियादिल। वय्कलं सकलें नेवाः जाति सतकय् कुहां वये मफुत धाःसा सुं नं नेवालं थःत नेवाः धायेगुया औचित्य दइ मखु धयादिल ।
पुलांम्ह न्वकु श्याम बहादुर तण्डुकारया सभापतित्वय् जूगु उगु ज्याझ्वलय् नायः मदन तण्डुकारं पुस ११ गते दशरथ रंगशालाय् सकलें मुनेमाःगु खँ ध्वाथुइक कनादिल ।
तण्डुकार समाजं वकुन्हु १० बजे भद्रकालीइ ब्यानर व सांस्कृतिक बाजं समेत मुनाः रंगशाला वनेगु निर्णय याःगु दु ।
