संविधानय् नेपाल संवत् च्वयेत प्रस्ताव
येँ (सन्ध्या टाइम्स)/नेपाः राष्ट्रिय पार्टीं नेपाःया राष्ट्रिय संवत् नेपाल संवत् आः दयेकीगु न्हूगु संविधानय् नं च्वयेत माग याःगु दु ।
जनतां पलिस्था याःगु नापं विश्वय् सुनाप नं ज्वःमलाःगु देय्या नामं पलिस्था जुयाच्वंगु नेपाल संवत्यात सरकारं तकं राष्ट्रिय संवत् धकाः मान्यता बीधुंकूगु अवस्थाय् नेपाःया संविधान धकाः च्वये धुनेवं विक्रम संवत् मच्वसे उगु थासय् नेपाल संवत् हे च्वयेमाः धकाः माग याःगु खः। नेपाःया राष्ट्रिय चिं धकाः थीथी कथंया चिं तइगु थें हे नेपाःया राष्ट्रिय संवत् नं संविधानय् हे उल्लेख जुइमाःगु माग नं नेपाः पार्टीं याःगु दु ।
पार्टीं संविधानसभाया संवैधानिक समितिइ उगु माग प्रस्ताव कथं तये धुंकूगु दु। पार्टीया उगु प्रस्तावयात कयाः संवैधानिक समितिया मुँज्याय् सहलह जुइगु खँ उगु पार्टीया नायः डा. केशवमान शाक्यं कनादिल। वइगु ८ गते समितिया बैठक च्वनी ।
