बन्द लिपा अवज्ञा व बहिष्कार आन्दोलन
येँ (सन्ध्या टाइम्स)/ एनेकपा (माओवादीं) नीस्वंगु संयुक्त राष्ट्रिय जनआन्दोलन नेपालं घोषणा याः कथं म्हिगः निसें कन्हय् तक न्ह्याइगु स्वन्हुयंकंया नेपाल बन्द लिपा अवज्ञा व बहिष्कार आन्दोलन शुरु याइगु जूगु दु ।
माओवादी स्थायीसमितिया दुजः नापं संयुक्त राष्ट्रिय जनआन्दोलन समितिया महासचिव नेत्र विक्रम चन्द 'विप्लवं' 'सन्ध्या टाइम्स' लिसे खँ ल्हासें आम हडताल (बन्द) लिपाया ज्याझ्वः अवज्ञा व बहिष्कार अभियान कथं वइ धयादिल।
वय्कलं थःपिं शान्तिपूर्ण रुपं हे आन्दोलन यायेगु पक्षय् दुगु नापं थ्व आन्दोलन विद्रोहया तयारी मखु धकाः नं धयादिल। नेता विप्लवं देय् संघीय संरचनाय् वन धकाः संविधानय् उल्लेख यानाः नं सरकार पक्षया दलत उगु कथं तयारी अवस्थाय् मदुगु कारणं आन्दोलनया हे झ्वलय् बाध्य जुयाः थःपिंसं जनताया भावना कथं स्वायत्त गणराज्य घोषणा यानागु खः धयादिल।
वय्कलं बाध्य जुल धाःसा कन्हय् वनाः आन्दोलनया हे झ्वलय् स्वायत्त गणराज्यया सरकार नापं केन्द्रीय स्तरया समानान्तर नागरिक सरकार समेत गठन याये मालेफु धासें तर अज्याःगु पलाः ल्ह्वने म्वाःलेमा धकाः हे शान्तिपूर्ण आन्दोलन याना वयाच्वनागु खः धयादिल ।
