चितवनय् जग्गाया भाः कुहां वल
येँ (सन्ध्या टाइम्स)/छेँबुँइ जुयाच्वंगु अत्यधिक लगानी क्वपालेगु लागिं फुक्कं वाणिज्य बैंकतय्त राष्ट्र बैंकं निर्देशन बीवं जग्गाया कारोवार सी दयेक हे प्रभावित जूगु दु। राजधानी सरे जुइगु धइगु हल्लां यानाः जग्गाया भाः थहां वनाच्वंगु चितवनय् राष्ट्र बैंकया थ्व निर्देशन वयेसातकि हे म्हिगः जग्गाया भाः ३३ प्रतिशत कुहां वःगु खँ अन जग्गाया कारोवार याइपिंसं धाःगु दु ।
अज्याःगु हे प्रभाव इटहरीइ नं लाःगु खँ धाःगु दु।
येँय् राष्ट्र बैंकया निर्देशन लिपा जग्गाया भाः कुहां हे थ्यंक मवःसां कारोवार धाःसा प्रभावित जूगु खँ सम्बन्धित मनूतय्सं धाःगु दु। थन जग्गा न्याये धकाः तयारी यानाच्वंपिंसं 'वाच एण्ड सी' शुरु याना हःगु दु ।
राष्ट्र बैंकया निर्देशन लिपा फुक्क हे वाणिज्य बैंकतय्सं जग्गा न्यायेत त्यासा कयातःपिंके ध्यबा याकनं लित बी माल धकाः दवाव बीगु व थ्व दवाव फये मफयाः दंक हे जूसां जग्गा मियाः बैंकया ध्यबा चुक्ता याये मालीगु अनुमान थन जुयाच्वंगु दु। बैंकतय्सं लगानीया न्हूगु थाय् मालेगु नं शुरु यायेधुंकूगु दु ।
