राष्ट्रवादी आन्दोलन च्वन्ह्याकेत इनाप
येँ (सन्ध्या टइम्स)/राष्ट्रवादी नागरिक पुचलं राष्ट्रवादी धारायात बल्लाकेगु झ्वलय् थन छगू आमसभा यात। सभाय् न्ववाःपिंसं साम्राज्यवादी व विस्तारवादीतय्त राजसंस्थानाप जानाः पराजित यायेमाःगु बिचाः प्वंकूगु खः ।
थौं देशय् श्रीपेच बिनाया जुजुपिंसं यानाः धर्म, संस्कृतिया सुरक्षा मजूगु खँ अशोकमान वैद्यं कनादिल। नीरा रंजितं राष्ट्र कल्याणया निंतिं जुजुयात हाकनं छकः सिंहासनय् तयेमाःगु बिचाः प्वंकादिल। नसिरुद्दिन अन्सरीं जन्मया आधारं अनेपालीतय्त नेपाली नागरिता बी मजिउ धयादिल। देय्या सीमा मिचे याःसां नेपाः सरकार ख्वाँय् व कां जुयाः सुम्क स्वयाच्वंगु द्वपं शिव देवकोटां बियादिल ।
सभापति जुयादीम्ह तारानाथ लुइँटेलं नेपाः देय्यात हिन्दू राज्य हे यायेमाः धयादिल ।
