थर्मल प्लान्टं सरकार लिचिल
विद्युत संकट म्हो यायेत थर्मल प्लान्ट स्थापना यायेगु धकाः सरकारं बिचाः हःगुयां छवाः लिपा हे उकिं लिचिलेगु संकेत बिउगु दु । सरकारं खुलाया दुने २०० मेगावाट बिजुली तापीय परियोजनपाखें उत्पादन यायेगु ग्वसाः न्ह्यःने हःगु खः । तर थुकिया निर्माण यायेत अर्बौं दां तुइगु व उकिं उत्पादन जुइगु विजुली थिके जुइगु खँ पिहां वयेवं सरकारं उकी पलाः मतयेगु संकेत बिउगु खः । जलस्रोत सचिव शंकर कोइरालां तापीय
उर्जा प्लाण्टं लोडशेडिङ म्हो यायेगु सरकारया सैद्धान्तिक निर्णय जक खः अन्तिम निर्णय मखु धासें थ्व संकेत बिउगु खः ।
अथे खःसां वय्कलं धयादीगु दु 'थ्व विकल्प लागू जुल धाःसा थुकिं अप्वइगु विद्युत महसुलया भार उपभोक्तां मखु सरकारं बेहोरे याइ ।' उद्योगी व्यापारीतय्सं तत्कालया आवश्यकता पूरा यायेत तापीय योजना हयेत सरकारयात इनाप यानाच्वंगु खः ।
विद्युत प्राधिकरणया भार सम्प्रेषण विभागया प्रमुख शेरिसंह भातं धाःसा वइगु फागुनंनिसें लोडशेडिङ न्हिं १६ घौ जुइगु खँ कनादिल । वय्कलं धयादिल 'थ्व लछि निलाया दुने लोडशेडिङ म्हो याये फइगु छुं हे उपाय मदु ।' थौंकन्हय् ८०० मेगावाट विद्युत माग दुसा २५० मेगावाट जक आपूर्ति दु । थ्व अवस्था म्होतिं नं न्यादँ तक जारी जुइ धाःगु दु ।
