एकीकृत माओवादी दयेकीगु
नेकपा एकता केन्द्र-मसाल या नकतिनि क्वचाःगु कार्यकर्ता भेलां माओवादीलिसे पार्टी एकता यायेगु निर्णय याःगु दु । उगु भेलां एकीकृत पार्टीया नां 'एकीकृत नेकपा माओवादी' तयेगु प्रस्ताव न्ह्यःने हःगु दु । थ्व भेला नं माओवादीया भेला जूगु थाय् खरिपाटीइ तुं जूगु खः ।
पार्टीया लाइनयात माओवाद धायेगु लाकि माओ विचारधारा धायेगु धकाः न्हापांनिसें वयाच्वंगु विवाद धाःसा अझ नं कायम हे जुइगु खनेदु । उकिं आः पार्टीया निर्देशक सिद्धान्तयात 'माक्स्रवाद लेनिनवाद माओवाद / माओ विचारधारा' धायेगु दथुया लाइन ज्वंगु दु । प्रचण्डपथ धाःसा आः उल्लेख मयायेगु सहमति नं कायम जूगु खँ धाःगु दु ।
२०४८ सालय् पार्टीया निर्देशक सिद्धान्तयात माओवाद धायेगु लाकि माओ विचारधारा धायेगु खँय् विवाद जुयाः हे तत्कालिन एकता केन्द्र विभाजन जुयाः नेकपा माओवादी धइगु बिस्कं पार्टी गठन जूगु खः । थ्व छगू विवाद धाःसा आः तकं कायम हे दनि ।
एकताया सन्देश बीगु लागिं थ्वहे पुसया दुने येँय् छगू तसकं तःधंगु प्रदर्शन यायेगु बारे बिचाः जुयाच्वंगु दु । निगुलिं पार्टीया केन्द्रीय दुजःत तयाः १५० सदस्यीय महाधिवेशन तयारी समिति गठन याइगु खँ दु ।
