'निक्व:गु जनआन्दोलन लिपा:या हे दकलय् खराव घटना'
बन्द लितकायेत राष्ट्रिय मानव अधिकार आयोगया इनाप
संयुक्त राष्ट्रसंघीय मानव अधिकार सम्बन्धी उच्च आयुक्तया नेपालय् च्वंगू ज्याकूथीं येँ आइतवा: बन्दया झ्वलय् निक्व:गु जनआन्दोलन लिपा:या हे दकलय् खराव हिंसात्मक अवस्था सृजना जूगु खँ धा:गु दु ।
आयुक्तया ज्याकूया प्रमुख रिचार्ड वेनेटं आइतवा: सनिलय् विज्ञप्ति पिथना: थंज्या:गु ज्या हानं मयायेत व दोषीतय्त कानुनी दायरालय् ह्येत धा:गु दु । आइतवा: बन्दया झ्वलय् न्हू बानेश्वरय् जूगु झडपय् छम्ह प्रहरी नायव उपरिक्षक गम्भीर घा:पा: नापं प्रदर्शनकारी व प्रहरी पाखे आपालं घा:पा: जूगु ख: ।
अथेहे प्रहरीं भीडय् अनावश्यक बल प्रयोग याना: लाठिचार्ज, टियर ग्याँस व अप्पां क्येकूगु खँ विज्ञप्तिइ न्ह्यथंनात:गु दु ।
विज्ञप्तिइ वेनेटं थ: प्रहरीं राजमार्गय् अवरोध चीकेगु अधिकार व प्रदर्शनकारीया शान्तिपूर्ण रुपं प्रदर्शन याये दइगु निगूलिं अधिकारया बारे जानकार जूगु खँ न्ह्यथंनादिसें छम्हं मेम्हेसित उत्तेजित देयेकीगु ज्यायात प्रोत्साहित मायायेत इनाप यानादीगु दु ।
अथेहे राष्ट्रिय मानव अधिकार आयोगं नं छगू विज्ञप्ति पिथंना: आमहड्तालं सर्वसाधारणया जनजीवन कष्टकर जुयावंगुलिं तत्काल बन्द लित कायेत माओवादीयात इनाप या:गु दु । आयोगं संवाद पाखें सहमति यायेत दक्वं दलयात आह्वान नं या:गु दु । आयोगं शान्ति सुरक्षा कायम यायेगु झ्वलय् आवश्यकता स्वयां अप्व बल प्रयोग मयायेत व संयम नालेत सरकारया ध्यानाकर्षण या:गु दु ।
