आन्दोलन शान्तिपूर्ण यासां नं दमन : माओवादी
एनेकपा (माओवादीं) स्वन्हून्यंकया आमहड्तालया न्हापांगु न्हिया आन्दोलन शान्तिपूर्ण जूसां नं प्रहरीं दमन या:गु खँ धा:गु दु ।
संयुक्त राष्ट्रिय जनआन्दोलन समितिया संयोजक डा. बाबुराम भट्टराईं आइतवा: सनिलय् छगू विज्ञप्ति पिथना: आन्दोलनय् प्रहरीं दमन या:गु खँ न्ह्यथंनादीगु दु । विज्ञप्तिइ जनआन्दोलनया पाखें हडतालयात शान्तिपूर्ण दयेकेत प्रयत्न जुसां नं बानेश्वर लगायतया थासय् जूगु नृशंस प्रहरी दमन व धरपकडया कारण छुं प्रतिरोधत नं जूगु खँ न्ह्यथंनात:गु दु । माओवादीं स्वन्हून्यंकया आमहड्तालया न्हापांगू न्हि शानदार जूगु नं दाबी या:गु दु ।
माओवादीं बानेश्वरय् प्रहरीं या:गु हस्तक्षेपय् गोली प्रहार, अन्धाधुन्धा हवाईफायर, अश्रुग्याँस प्रहार, ल:या फोहरा प्रहार व लाठी चार्जं आपालं आन्दोलनकारीत घा:पा: जूगु खँ धा:गु दु । वानेश्वरय् प्रहरी हस्तक्षेपय् घा:पा: जुम्ह मधु चौलागाईंयात आईसीयूलय् भर्ना यानात:गु खँ माओवादीं धा:गु दु । अथेहे सभासद्त यशोदा सुवेदी व भीमप्रसाद गौतम नापं न्यय्म्ह स्वयां अप्व कार्यकर्ता घा:पा: जूगु नं धा:गु दु ।
विज्ञप्तिइ प्रहरीं सप्तरील ८०, बागलुङय् ५, कास्कीलय् ४ कार्यकर्तातय्त ज्वना यंकूगु खँ धा:गु दु । अथेहे येँया सुन्धारां नेवाः राष्ट्रिय मुक्तिमोर्चाया केन्द्रीय सचिव सुरेश श्रेष्ठ, गौशालां नरबहादुर तामाङ, प्रकाश अधिकारी, शेखरनाथ आचार्य, विशाल, राजेशलगायत च्याम्ह ज्वना यंकूगु खँ धा:गु दु
माओवादीं शान्तिपूर्ण आन्दोलनय् सरकारं ल्वाभ: व कठीया भरय् दमन याना: थ:गु आयु ता:हाकेगु कुत: या:गु द्वपं ब्यूगु दु ।
