घाःपाः जूम्ह डीएसपीया अवस्था चिन्ताजनक
एनेकपा (माओवादीं) आह्वान याःगु स्वन्हुन्यंकया आम हड्तालया न्हापांगु न्हि येँया न्हू बानेश्वरय् प्रहरी व माओवादी कार्यकर्ता दथुइ जूगु ल्वापू डीएसपी नापं पीम्ह घाःपाः जूगु दु ।
न्हू बानेश्वरय् च्वंगु ट्रलिबस ज्याकू न्ह्यने स्वघौ तक जूगु ल्वापूइ प्रदर्शनकारीतय्सं दायाः घाःपाः जूम्ह डीएसपी दीलिप चौधरीया अवस्था चिन्ताजनक जूगु दु । वयेकयात प्रहरी अस्पतालय् वासः याकेत सम्भव मजुयाः बाँसबारी स्थित न्युरो अस्पतालय् यंकूगु दु । वयेकयात घाःपाः जुइवं तत्काल कान्तिपुर अस्पतालय् यंकूगु खःसाः अन वासः याके मफेवं महाराजगंजय् च्वंगु प्रहरी अस्पतालय् यंकूगु खः ।
घाःपाः जुयाः अवस्था चिन्ताजनक जूम्ह महानगरीय प्रहरी वृत न्हू बानेश्वरया चौधरीया प्यताः ईलय् तिनि होश वःगु खः । माओवादीया निगूगु चरणया आन्दोलनया झ्वलय् अनामनगर, हनुमानथानय् खटे जूम्ह चौधरीं प्रदर्शनकारीयात बल प्रयोग याःगु धासें वयेकयात माओवादीं निगरानीलय् तयातःगु खः ।
प्रधानमन्त्री माधवकुमार नेपाल कोपनहेगनं लिहांझायेगु ज्याझ्वः दुगुलिं विमानस्थल निसें न्हू बानेश्वरया लँपू चायेकेत प्रहरीं लाठीचार्ज, अश्रुग्यास व लःया फोहोरां नं प्रहार याःगु खः । प्रधानमन्त्रीयात सवारी रुट चायेकेगु ईलय् जूगु ल्वापूइ मओवादी सभासद् यशोदा सुवेदी सहित स्वीनिम्ह प्रदर्शनकारीत घाःपाः जूगु दु ।
अथेहे ल्वापू लानाः न्हय्म्ह प्रहरी जवानत घाःपाः जूगु दुसाः आन्दोलनकारीतय्सं क्येकूगु अप्पां लानाः अन्नपूर्ण पोस्ट दैनिकया फोटो पत्रकार निरज चित्रकार घाःपाः जूगु दु ।
