थुगु आर्थिक दँय् नगदे बालीया भाः उच्च रुपं च्वय्
येँ (सन्ध्या टाइम्स)/थुगु आर्थिक दँया वंगु प्यलाया दुने कृषिजन्य नगदे बालीया भाः गाक्कं थहां वंगु दु। नेपाल राष्ट्र बैंकं बिउगु छगू जानकारी कथं थुगु ईया दुने मेमेगु उपभोग्य ज्वलं स्वयां कृषिजन्य नगदेबालीया भावय् ११६ प्रतिशतं थहां वंगु दु ।
तर थगुनेया थ्व हे ईया दुने धाःसा नगदे बालीया ज्वलनय् धाःसा २३ प्रतिशतं भाः कुहां वःगु खः। अथे हे मसलाय् ३७ प्रतिशत, पशुजन्य उत्पादनय् ३३ प्रतिशतं भाः थहां वंगु दु। थगुने थ्व हे इलय् मसलाय् न्हय्गू प्रतिशत व पशुजन्यय् २२ प्रतिशतं भाः कुहां वःगु खः ।
तराकारी व सिसाबुसनय् नं थ्व अवधीया दुने ३३ प्रतिशतं भाः थहां वंगु दुसा थगुने करीब न्यागू प्रतिशतं भाः कुहां वंगु खः ।
उकथं हे नसा ज्वलंया लिसें त्वँसा ज्वलं व सूर्तीजन्य ज्वलनय् नं औसभा स्वयां झिंप्यंगू प्रतिशतं भाः थहां वंगु बैंकं जानकारी बिउगु दु। अथे हे पिने आयात यानाहःगु पेट्रोलियम पदार्थ व कोइलाय् धाःसा झिंन्हय्गू प्रतिशतं भाः कुहां वःगु दुसा थुगु ज्वलनय् थगुने थ्व हे इलय् नीन्यागू प्रतिशतं भाः थहां वंगु खः ।
नसा-त्वँसाया लिसें थुगु आर्थिक दँया न्हापांगु प्यलाया दुने कर्मचारी तलब व ज्यालादारीइ नं नीनिगू प्रतिशतं थहां वंगु दु ।
थुगु आर्थिक दँया शुरुंनिसें हे तलब वृद्धि जूगुलिं नं तलबया लिसें ज्यालाय् नं वृद्धि जूगु बैंक न्ह्यथंगु दु। थ्व ईया दुने कृषि मजदुरतय् ज्यालाय् नं करीब नीनिगू प्रतिशतं थहां वंगु
दु ।
