नेवाः वकिल व डाक्टरतय् पुचः
येँ (सन्ध्या टाइम्स)/११ गते नेवाः स्वायत्त राज्य घोषणा यायेगु झ्वलय् म्हिगः नेवाः लयर्स एशोसिएसन व नेवाः स्वास्थ्यकःमि पुचः नीस्वंगु दु। नेवाः वकिल व नेवाः स्वास्थ्यकःमितय् पुचः स्वंगु थ्वहे न्हापांखुसी खः। थ्व स्वयां न्ह्यः नेवाः इन्जिनीयरतय् पुचः नं स्वनेधुंकूगु दु।
नेवाः वकिलतय् भेलां नेवाः राज्य घोषणा जुइ कुन्हु थःपिंसं ब्यानर हे ज्वनाः ब्वति कायेगु व उकिया तयारी कथं याकनं छगू तःधंगु भेला यायेगु नं क्वःछिउगु दु। मुँज्यां ज्ञानरत्न शाक्यया नेतृत्वय् नेवाः लयर्स एशोसिएसन स्वंगु खःसा छ्याञ्जेय् अर्जुन महर्जन, दांभरिइ अनिता महर्जन च्वनादीगु दु। पुचलय् झिंस्वम्ह दुजः दु ।
अथे हे म्हिगः हे नेवाः स्वास्थ्यकःमितय् भेलां नेवाः स्वास्थ्यकःमि पुचः नं नीस्वंगु दु। भेलाय् नेवाः स्वायत्त राज्य मंकाः संघर्ष समितिपाखें मल्ल के सुन्दर, डा. महेशमान श्रेष्ठ व सुजिव बज्राचार्यं ब्वति कयादीगु खः। भेलां डा. भास्कर कायस्थ, डा. सुशिला प्रजापति, डा. रमिला श्रेष्ठ, डा. सितुलाल श्रेष्ठ, डा. मनोज श्रेष्ठ आदि दुथ्याःगु नेवाः स्वास्थ्यकःमि पुचः नीस्वंगु दु ।
अथे हे म्हिगः नेवाः कलाकार व नेवाः इन्जिनीयरतय् मुँज्या नं च्वंगु दु ।
