थनिंनिसें एम्बुलेन्स, फोहर व दमकल नं बन्द
येँ (सन्ध्या टाइम्स)/ देय्न्यंकंया स्थानीय निकायय् तालंग्वयाः आन्दोलनय् कुहां वयाच्वंपिं स्थानीय निकायया कर्मचारीतय्सं थनिंनिसें एम्बुलेन्स, फोहर मुंकेगु ज्या व दमकल सेवा तकं बन्द याःगु दु ।
स्थानीय निकाय कर्मचारी केन्द्रीय आन्दोलन समन्वय समितिया आह्वानय् कर्मचारीतय्सं थनिंनिसें स्थानीय निकायपाखें सञ्चालन जुया वयाच्वंगु अत्यावश्यक सेवा नं बन्द यायेगु झ्वलय् दमकल, फोहर मुंकेगु व एम्बुलेन्स सेवा बन्द याःगु खः ।
स्थानीय निकायया कर्मचारीतय्त ट्रेड युनियनया अधिकार दयेमाःगु, स्थानीय सेवा आयोग नीस्वनेमाःगु, २०६५ साल असार महिनाया दुने नियुक्त जूपिं कर्मचारीतय्त स्थायी यायेमाःगु नापं थीथी माग तयाः स्वंगूगु चरणया आन्दोलन याना वयाच्वंगु खः ।
थ्व झ्वलय् कर्मचारीतय्सं वइगु पुस ९ गते येँय् छगू विरोध जुलुस पिकयाः सिंहदरवारय् धर्ना बीगु नापं पुस १० गतेनिसें न्हियान्हिथं स्थानीय विकास मन्त्रालयय् वनाः धर्ना च्वनेगु ज्याझ्वः नं घोषणा यायेधुंकूगु दु ।
लुमंकेबहः जू उगु आन्दोलनय् माओवादी, कांग्रेस व एमाले आवद्ध स्थानीय निकायया कर्मचारी सहित न्यागू संगठन दुथ्यानाच्वंगु दु ।
