नरहरियाके स्पष्टीकरण काइगु
येँ (सन्ध्या टाइम्स)/नेपाली कांग्रेस सतीगु लोकतान्त्रिक नेवाः दबुलिं नेकांया केन्द्रीय दुजः व संविधानसभाया राज्य पुनर्संरचना समितिया दुजः नरहरि आचार्ययात सःताः वय्कलं नेवाः स्वायत्त राज्य नेपालमण्डलया गठन सम्भव मदु धयादीगुलिं छाय् अथे धयागु धकाः स्पष्टीकरण काइगु जूगु दु। म्हिगः दबूपाखें याःगु ध्वाँय् उलेज्याय् वय्कलं अथे न्ववानादीगु खः ।
पुस ११ गते जुइगु नेवाः स्वायत्त राज्य घोषणाया झ्वलय् म्हिगः लोकतान्त्रिक नेवाः दबुलिं थःगु ध्वाँय् उलेज्या व तुच्चा ज्याझ्वः याःगु खः। ज्याझ्वलय् जवंखवं ह्याउँगु व दथुइ तुयुगु अले उकिया दुने मुस्याः (चिलाख) दुगु ध्वाँय् न्हूदँ समारोह समितिया नापं नेकां सभासद् तीर्थराम डंगोलं उलेज्या यानादीगु खः ।
ज्याझ्वलय् ध्वाँय्या बारे दबूया मू छ्यांज्ये भगवान शाक्यं कनादीगु खः। दबूया नायः गजेन्द्रमान मानन्धरया सभापतित्वय् जूगु उगु ज्याझ्वलय् नेवाः राज्य गठनया आवश्यकता बारे कनेगु ज्या जूगु खः। वीरेन्द्रभक्त श्रेष्ठं सुभाय् बियादीगु खः ।
