आशा यानाः कथं सफल मजू : प्रधानमन्त्री
प्रधानमन्त्री माधवकुमार नेपालं कोपनहेगनय् जूगु जलवायु परिवर्तन सम्बन्धी राष्ट्रसंघीय विश्व शिखर सम्मेलन विषयगत जटिलताया कारणं थम्हं बिचाः यानाः कथं सम्मेलन सफल जुइ मफूगु खँ धयादीगु दु ।
सम्मेलनय् ब्वति कयाः आइतवाः न्हिनय् त्रिभुवन विमानस्थल थ्यंकादीम्ह प्रधानमन्त्री नेपालं अन हे छगू पत्रकार सम्मेलन यानाः वयेकलं तःमि राष्ट्रतय्सं बीगु ध्यबाय् सहमति जुइमफेवं सम्मेलन सफल जुइ मफूगु धयादिल । वयेकलं जलवायु परिवर्तनं हिमालय् खनेदुगु असरया बारे विश्व समुदायया ध्यानाकर्षण यायेत थः सफल जूगु धयादिल ।
अथेहे वयेकलं बन्द हड्ताल थंज्याःगु गतिविधिं संविधान निर्माणय् लिच्व: लाइगु धयादिसें थ:पिंसं हे प्रतिबद्धता याःगु कथं थंज्याःगु ज्याखँ मयायेत माओवादीयात इनाप यानादिल । नेपाली जनतायात दुःख जुइ कथं शान्ति सम्झौता विपरीतया ज्या मयायेत प्रधानमन्त्रीं माओवादीयात इनाप यानादीगु ख: ।
प्रधानमन्त्री नेपालं वार्ता व सहलह मार्फत देय्यात राजनीतिक निकास बीत थम्हं न्हपा नं पहल यानागु व आः नं यानाच्वनेगु नं धयादिल ।
वंगु मंसिर २९ गते नेपाःया प्रतिनिधि मण्डलया नेतृत्व यासें प्रधानमनत्री नेपाल डेनमार्कया राजधानी कोपनहेगन प्रस्थान यानादीगु खः । प्रधानमन्त्री नेपालं वंगु बुधवाः सम्मेलनय् सम्बोधन यानादीगु खः ।
