बन्दं जनजिव प्रभावित, स्वीछम्ह प्रर्दशनकारीतय्त ज्वन
एकीकृत नेकपा (माओवादीं) आह्वान याःगु स्वन्हुन्यंकया बन्दया न्हापांगु न्हि देय्न्यंकया जनजीवन प्रभावित जूगु । बन्दया कारणं देय्न्यंकया यातायात, बजाः, शैक्षिक संस्था आदि दक्वं ठप्प जूगु दु ।
माओवादी कार्यकर्तातय्सं देय्या थीथी थासय् सुथंनिसें हे प्रर्दशन याःगु दु । बन्दया झ्वलय् सवारीसाधन चले याःगु धासें प्रर्दशनकारीतय्सं येँ, पोखरा व राजविराजय् तोडफोड यायेवं प्रहरीं स्वीम्ह स्वयां अप्वः प्रर्दशनकारीतय्त ज्वना यंकूगु दु ।
येँया बत्तिसपुतली, पुतलीसतक व बानेश्वरय् न्यागः सवारी साधनय् तोडफोड याःगु दुसाः पोखरा व राजविराजय् नं छगः-छगः ट्याक्सीइ तोडफोड याःगु दु । प्रहरीं येँ नं झिंनिम्ह व राजविराजं झिंगुम्हेसित नियन्त्रणय् का:गु दु ।
अथेहे येँया न्हू बानेश्वरय् प्रहरी व माओवादीया कार्यकर्ता दथुइ अप्पां क्येकाः छझाः ल्वापू नं जूगु दु । उगु ईलय् प्रर्दशनकारीतय्त नियन्त्रणय् कायेत प्रहरीं छुं राउण्ड अश्रुग्यास नं क्येकूगु खः । बन्दया कारणं देय्न्यंक जनजीवन प्रभावित जूगु दुसाः माओवादीं एम्बुलेन्स, प्रेस, कुटनीतिक नियोग लगायत सवारी साधनयात बन्दय् अवरोध मयायेगु खँ धाःगु दु ।
