बन्द लितकायेत मन्त्रिपरिषदया इनाप
कार्यवाहक प्रधानमन्त्री विजयकुमार गच्छदारया अध्यक्षताय् शनिवाः च्वंगु मन्त्रिपरिषदया बैठकं एनेकपा (माओवादी)यात आइतवाः निसें घोषित आमहड्तालया ज्याझ्वः लितकायेत इनाप याःगु दु । नापं आमहड्ताल लितमकासाः सुरक्षा निकाययात प्रभावकार ढंगं परिचालन यायेत नं निर्देशन जारी याःगु दु ।
अथेहे बैठकं शान्ति प्रकृयायात सहज रुपं न्ह्याकेत व न्हूगु संविधान निर्माणया निंतिं छगू प्रस्ताव नं पारित याःगु दु । प्रस्तावय् दक्वं पक्षयात शान्ति सम्झौता विपरित जुइगु ज्या मयायेत, संक्रमणकालीन स्थितियात आत्मसात यानाः शान्ति सुरक्षा कायम यायेगु ज्याय् ग्वाहालि यायेत, शान्ति प्रकृया व संविधान निर्माणय् प्रतिकुल लिच्वः लाइ कथं मयासें संविधान निर्माण यायेगु ज्याय सकारात्मक भूमिका म्हितेत, राजनीतिक दलत दथुइ कटुता व द्वन्द्व उत्पन्न जुइगु ज्याखँ मयायेत इनाप यानात:गु दु ।
सार्वजनिक व व्यक्तिगत सम्पति व छेँबुं कब्जा यायेगु ज्या दिकेत, विरोध प्रदर्शया नांमय् हिंसात्मक गतिविधि मयायेत नं प्रस्तावय् दक्वसियां ध्यानाकर्षण याकूगु दु ।
प्रस्तावय् समस्या समाधानया निंतिं राजनीतिक संवाद जारी दुगु अवस्थाय् आमहड्तालं अम जनताया जनजीवनय् प्रभाव लाकीगु खँ न्ह्यथें बन्द लितकयाः शान्तिपूर्ण रुपं समस्याया समाधान यायेत नं धयातःगु दु ।
