सहमति जुसाः जक आमहडताल लित कायेगु : माओवादी
एकीकृत नेकपा (माओवादीं) स्वंगूगु चरणया आन्दोलन कथं आइतवाः निसें स्वन्हुन्यंक यायेत्यंगु आमहडतालया ज्याझ्वः राजनीतिक सहमति जूसाः जक लितकायेगु खँ धाःगु दु ।
नेकपा (एमाले)या अध्यक्ष झलनाथ खनालं शनिवाः माओवादी ज्याकूथी वनाः स्वन्हुनयंकया आमहडतालया ज्याझ्वः लित कायेत यानादीगु इनापया लिसलय् माओवादीं थ्व खँ धाःगु खः । गृहमन्त्री भीम रावल नापं अन थ्यंकादीम्ह खनालं राजनीतिक सहमतिया निंतिं माओवादीया पूर्व निर्धारित ज्याझ्वः लितकायेत इनाप यानादीगु खः ।
माओवादी अध्यक्ष प्रचण्ड नापया खँल्हाबंला लिपा एमाले अध्यक्ष खनालं पत्रकारतय्त शान्ति प्रकृयायात निष्कर्षय् थ्यंकेत व न्हूगु संविधा निर्माण यायेत सहमतिया विकल्प मदुगुलिं बन्द ज्याझ्वः लितकायेत इनाप यानागु कनदिल ।
माओवादी ज्याकू वने न्ह्यः एमाले अध्यक्ष खनाल कांग्रेस सभापति गिरिजाप्रसाद कोइरालायात नापलाना राजनीतिक गतिरोधया बारे खँल्हाबंला यानादीगु खः । उगु ईलय् कोइरालां तत्काल राजनीतिक निकास पिकायेत खनालयात इनाप यानादीगु खः । वयेकलं राजनीतिक अवस्था स्यनावनाच्वंगु प्रति च्यूताः प्वंकादिसें थम्हं नं समस्या ज्यंकेत कुत यायेगु व खनालयात नं कुतः यायेत इनाप यानादीगु खः ।
