'माओवादीं हे पत्रकार टीका विष्टयात आक्रमण'
नेकपा (एमाले)या वरिष्ठ नेता केपी शर्मा ओलीं रुकुमया पत्रकार टीका विष्टयात माओवादीं हे आक्रमण याःगु खँ धयादीगु दु । वयेकलं आक्रमण यानाः नं जिम्मेवारी काये मफुगु माओवादीया निंतिं लज्जाजनक खँ जूगु धयादिल । वयेकलं जिम्मेवारी कयाः सामना यायेमफुपिंसं छाय् थंज्याःगु ज्या यायेगु धयादिसें थम्हं याःगु ज्याया जिम्मा काये मफुगु तःधंगु बेइमानी जूगु धयादिल ।
प्रेस चौतारी दाङं शनिवाः सुथय् घोराहीलय् याःगु पत्रकार सम्मेलनय् न्ववादिसें वयेकलं माओवादीया सनक अप्वयाच्वंगु धयादिल । वयेकलं थंज्याःगु ज्या माओवादीया निंतिं हे खतरनाक जुइगु धयादिसें माओवादी नाप सुधार जुइगु वा समाप्त जुइगु विकल्प जक ल्यं दनीगु धयादिल ।
माओवादीया न्ह्यावलें तीव्र आलोचना जक छाय् यानादीगु धकाः पत्रकारतय्सं न्यंगु न्ह्यसःलय् वयेकलं कम्युनिष्टया बदनाम याःगु थम्हं सह यायेमफुगु धयादिसें माओवादीं नं कम्युनिष्टया बदनाम याःगु धयादिल । वयेकलं मेपिं माओवादी खनाः ग्याःगु तर थः सु नाप नं मग्याःगु व माओवादीयात सुधार यायेत हे थम्हं आलोचना यानागु धयादिल ।
अथेहे वयेकलं राष्ट्रपतिं छुं द्वंकूगु हे मदु धयादिसें भिंकेमाःगु छुं हे मदु धयादिल । वयेकलं माओवादी आन्दोलन आन्दोलन हे मखुगु धयादिसें संविधान निर्माण यायेगु ईलय् माओवादी सतकय् वनाः संविधान निर्माण यायेगु ज्या लिबाकाच्वंगु धयादिल ।
