मिथिला राज्यया माग जायज : भट्टराई
एनेकपा (माओवादी)या उपाध्यक्ष डा. बाबुराम भट्टराईं स्थानीयवासीतय्सं ल्ह्वनाच्वंगु स्वायत्त मिथिला राज्यया माग जायज जूगु खँ धयादीगु दु ।
शनिवाः सुथय् जनकपुरय् ग्वसाःग्वःगु पत्रकार सम्मेलनय् वयेकलं मिथिला थुगु देय्या दकलय् पुलांगु संस्कृति जूगु धयादिसें स्वायत्त मिथिला राज्यया माग उचित व तर्कसंगत जूगु धयादिल । मैथिल जनतां चाहे जूसाः स्वायत्त मिगिला राज्यया पक्षय् माओवादी नं वइगु वयेकलं धयादिल ।
माओवादीं घोषणा याःगु गणराज्यया ज्याझ्वः सांकेतिक व दवावमुलक जक जूगु धयादिसें नेता भट्टराईं संघीयताया बारे निर्णय संविधानसभां हे याइगु धयादिल । वयेकलं कांग्रेस व एमाले संघीयता विरोधी पार्टी जूगु दाबी यानादिसें मधेशवादी दलत नं मन्त्री जुइगु लोभय् कांग्रेस व एमालेया हे ल्यूने वनाः संघीयताया विरोध यानाच्वंगु धयादिल ।
वयेकलं माओवादीं हे संविधानसभाया माग न्ह्यने सारे याःगु धयादिसें थुकीया विरुद्ध माओवादी जुइ हे मफइगु दावी यानादिल । वयेकलं माओवादी याकनं स्वयां याकनं संविधान निर्माण यायेगु पक्ष दुगु नं धयादिल ।
