कांग्रेसं याकनं हे संघीय राज्यया अवधारण क्वःछी : सुशील
नेपाली कांग्रेसया कार्यवहाक सभापति सुशील कोइरालां संघीय राज्यया विषयलय् पार्टीं आधिकारीक धारणां याकनं क्वःछीगु खँ धयादीगु दु ।
प्रेस युनियन धनुषां शनिवाः सुथय् जनकपुर नगरपालिकाया सभाकक्षय् याःगु पत्रकार सम्मेलनय् न्ववानादिसें वयेकलं संघीय संरचना बारे पार्टीया स्पष्ट बिचाः मःवगुलिं यक्व विरोध जूगु धयादिसें आः याकनं हे आधिकारीध धारणा क्वःछीगु धयादिल ।
शुक्रवाः जक स्वायत्त मधेश राज्यया घोषणा यानादिसें माओवादी उपाध्यक्ष डा. बाबुराम भट्टराईं कांग्रेसं राज्यया पुर्नसंरचना याये चाहे मजूगुलिं उगु पार्टीया छुं स्पष्ट धारण पिहांमवःगु द्वपं बियादीगु खः ।
माओवादीं स्वयात्त गणराज्य घोषणा यानाः देशय् गृहयुद्ध ब्वलंकेगु कुतः याःगु द्वपं बियादिसें कार्यवहाक सभापति कोइरालां माओवादीं शान्ति सम्झौता व कानूनी राज्यया उपहास याःगु धयादिल । वयेकलं माओवादीया गणराज्य घोषणां संविधानसभाया औचित्य हे समाप्त याःगु द्वपं बियादिसें नागरिक सर्वोच्चताया नांमय् माओवादीं एकतन्त्रीय शासन लागू यायेत स्वःगु नं धयादिल ।
