माओवादी पाखें स्वयात्त मधेश गणराज्य घोषणा
मधेशवादी दलत माओवादीया प्राकृतिक पासा : भट्टराई
नागरिक सर्वोच्चताया माग यानाः स्वंगूगु चरणया आन्दोलनया झ्वलय् स्वयात्त गणराज्य घोषणा यानाः आन्दोलन यानाच्वंगु एनेकपा (माओवादीं) गणराज्य घोषणाया लिप्पांगु न्हि शुक्रवाः स्वायत्त मधेश गणराज्यया घोषणा याःगु दु ।
जनकपुरया ऐतिहासिक रंगभूमि मैदानय् द्वलंद्वः पार्टी कार्यकर्तातय् दथुइ माओवादीया उपाध्यक्ष नापं संयुक्त जनआन्दोलन समितिया संयोजक डा. बाबुराम भट्टराईं स्वायत्त मधेश गणराज्यया घोषणा यानादीगु खः ।
ज्याझ्वलय् माओवादी उपाध्यक्ष भट्टराईं मधेशया अधिकारया निंतिं सामूहिक कुतः यायेमा:गु आवश्यकताय् बः बियादिल । वयेकलं मधेशवादी दलत माओवादीया प्राकृतिक पासा शक्ति जूगु धयादिसें पदया लोभय् मधेशया मुद्दा नाप सम्झौता मयायेत इनाप यानादिल । वयेकलं मधेशवादी दलतय्सं ल्ह्वनावःगु संघीयता व समावेशीया मुद्दा दकलय् न्हापां माओवादीं हे ल्ह्वंगु धयादिसं माओवादीया मधेश राज्य घोषणाया विरोध छाय् यायेमाःगु धकाः न्ह्यसः न्यनादिल ।
वयेकलं मधेशीत बहादुर व राज्य सत्ताया पुलांपिं जानकार जूगु धयादिसें झिंस्वंगूगु-झिंप्यंगूगु शताब्दीलय् सिम्रौनगढया मधेशी जुजुं येँया जुजुयात त्याकाः झिदँ तक येँ शासन याःगु धयादिल । आः निर्माण जुइगु न्हूगु नेपालय् नं मधेशीतय्सं निर्णायक भूमिका म्हितेमाः धादिलल ।
माओवादीं मिथिला, भोजपुरा व अवधयात उपराज्यया कथं छथाय् तयाः मधेश राज्य घोषणा याःगु खः ।
