झिक्वःगु बौद्ध सम्मेलन थौं क्वचाइगु

लुम्बिनी (सन्ध्या टाइम्स)/लुम्बिनी विकास राष्ट्रिय प्रतिष्ठा धइगु नारा थ्वयेकाः म्हिगःनिसें शुरु जूगु झिक्वःगु राष्ट्रिय बौद्ध सम्मेलन थौं क्वचायेत्यंगु दु। म्हिगः राष्ट्रपति रामबरण यादवं बोधिमत च्याकाः सम्मेलनया उलेज्या यानादीगु खः। ज्याझ्वलय् वय्कलं बुद्ध जन्मभूमि लुम्बिनीयात सकल नेपाःमितय्सं थःगु मातृभूमि कथं चूलाके खंगु झीगु गौरवया खँ खः धयादिसें थौं विश्वय् हे असहज परिस्थिति जुयाच्वंगु इलय् नेपाःया द्वन्द्व ब्यवस्थापन व शान्ति स्थापनाय् थुगु सम्मेलनं तःधंगु योगदान याइगु विश्वास प्वंकादिल।
ज्याझ्वलय् राष्ट्रपति यादवं बौद्ध विद्वान तिलकमान गुभाजुयात धर्मोदय धम्म सिरपाः लःल्हानादीसा राष्ट्रपति यादवयात धर्मोदय सभां धर्मोपद उपहार लःल्हाःगु खः।
ज्याझ्वलय् संस्कृति मन्त्री डा. मिनेन्द्र रिजालं बुद्धया जन्मस्थल भारतय् लाः धकाः जुयाच्वंगु प्रचार मदयेकेत नं थुगु सम्मेलन ताःलाइगु विश्वास प्वंकादिल। ज्याझ्वलय् धर्मोदय सभाया उपाध्यक्ष व विश्व बौद्ध भातृत्व संघया उपाध्यक्ष पद्म ज्योति, श्रीलंकाया राजदूत योसामाला हेवागे, थाइलैण्डया राजदूत मारिसाइग्यो ग्यंग, धर्मोदय सभाया महासचिव सुचित्रमान शाक्यपिंसं नं नेपालय् बुद्ध धर्म बारे थःपिनि बिचाः प्वंकादीगु खः ।

धर्मोदय सभाया नायः पण्डित बद्रीरत्न बज्राचार्यया सभापतित्वय् जूगु समारोहय् बज्रयान, हिनयान व महायान सम्प्रदायया धर्मगुरुपिंसं प्रार्थना याःगु खः। थौं देवेन्द्रराज शाक्यं 'लुम्बिनी व धर्माचरण' विषयय् ज्यापौ न्ह्यब्वयाः गोष्ठी शुरु याःगु दुसा उकी प्यंगू पुचः दयेकाः सहलह ब्याकूगु दु। थौं समापन समारोहय् मू पाहां कथं माओवादी अध्यक्ष पुष्पकमल दाहाल प्रचण्ड झाइगु ग्वसाः दु ।