संविधान निर्माणय् माओवादी बाधक : मन्त्री रिजाल
संसदीय व्यवस्था, संघीय मामिला व संस्कृतिमन्त्री मिनेन्द्र रिजालं माओवादी शान्ति, लोकतन्त्र व अग्रगमनया लँपू पाखें पिने वनाः संविधान निर्माणय् बाधक जुयाच्वंगु द्वपं बियादीगु दु ।
प्रेस युनियन सुनसरीं शुक्रवाः इटहरीलय् याःगु पत्रकार सम्मेलनय् वयेकलं झिंनिगू बुँदे सम्झौता निसें संविधान सभा निर्वाचन तक जूगु सहमति विपरीत माओवादीं न्ह्यावनाच्वंगु धयादिसें माओवादी संविधान निर्माण यायेगु स्वयां सत्ता कब्जा यायेगु लक्ष्य कयाः न्ह्याः वनाच्वंगु धयादिल ।
वयेकलं शान्ति प्रकृयायात तार्किक निर्ष्कषय् थ्यंकेत व संविधान निर्माण यायेत अन्तिम ईलय् तक माओवादीयात सहमतिलय् ह्येगु कुतः यायेगु धयादिल । माओवादीं संविधानसभा पाखें संविधान च्वयेगु ज्याय् इमान्दार मजूगुलिं हे देयन्यंक गणराज्य घोषणा याःगु टिप्पणी यानादिल ।
मन्त्री रिजालं माओवादीं लडाकू पुनस्थापना व व्यवस्थापन यायेगु ज्याय् तकं ग्वाहालि मयाःगु धासें माओवदीया ज्याखँ प्रति आपत्ति प्वंकादिल ।
