माओवादी दुने अपराधीक जत्थाया हावी : खनाल

सत्तारुढ नेकपा (एमाले)या अध्यक्ष झलनाथ खनालं एनेकपा (माओवादी) दुने अपराधीक जत्थाया हावी जूगु द्वपं बियादीगु दु ।

एमाले सन्धुपाल्चोकया न्हय्क्वःगु जिल्ला अधिवेशनया शुक्रवाः मेलम्चीलय् उल्लेज्या यानादिसें अध्यक्ष खनालं माओवादीं एमालेया कार्यकर्तायात आक्रमण यानाच्वंगु प्रति आक्रोश प्वंकादिल । वयेकल मेपिनिगु पार्टीया सभाय् आक्रमण याइगु पार्टी कम्युनिष्ट जुइमफइगु धयादिल ।

वयेकलं माओवादीया थंज्याःगु हे पह खःसा उमि गां पाखें सिधयाः संविधानसभाय् जक बांकी जुइगु दाबी यानादिल । माओवादीया हे कारणं वर्तमान गतिरोधं निकास पिकाये मफुगु नं वयेकलं धयादिल । वयेकलं माओवादीं अन्तरिम संविधान व शान्ति सम्झौता विपरीत गणराज्य घोषणा यानाजूगुलिं देशय् द्वन्द्वया खतरा जूगु धयादिल ।