माओवादीपाखें उर्जामन्त्रीयात अप्पां क्येकल, बागलुङय् तनाव
आन्दोलनरत एनेकपा (माओवादी)या कार्यकर्तातय्सं उर्जामन्त्री डा. प्रकाशशरण महतयात आक्रमण याःगु दु । आक्रमणया झ्वलय् नेपाल महिला संघ बागलुङया सचिव शकुन्तला शर्मा गम्भीर घाःपाः जूगु दु । अथेहे प्रहरी नापया ल्वापूइ न्याम्ह माओवादी कार्यकर्ता नं घाःपाः जूगु दु ।
मोदीखोला जलविद्युतया अनुगमनया झ्वलय् बागलुङ थ्यंकादीम्ह मन्त्री महतं पार्टी कार्यकर्ता नापलायेत वनेत्यंगु ईलय् माओवादी कार्यकर्तातय्सं हाकूगु ध्वाँय् क्यनाः अप्पां क्येकूगु खः । माओवादीया अक्रमण लिपाः प्रहरीं लाठीचार्ज यायेवं माओवादी कार्यकर्तात होमनाथ चालिसे, राजिव घिमिरे, निर्मल जिसी, प्रशंसा केसी व मिना विक घाःपाः जूगु दु । घाःपाः जूपिंत धौलागिरी अञ्जल अस्पतालय् वासः याकातःगु दु ।
माओवादी कार्यकर्तातय्सं क्येकूगु अप्पां मन्त्री महतया बा. १. झ. १०२६ नम्बरया गाडीलय् क्षति जूगु दु । माओवादीं धाःसाः शान्तिपूर्ण प्रर्दशनय् प्रहरीं दमन याःगुलिं अप्पां क्येकेमाःगु खँ धाःगु दु । थःपिनिगु शान्तिपूर्ण आन्दोलनय् प्रहरीं दमन याःगु धासें माओवादीं बागलुङ बजाः बन्द याकूगु दु ।
अथेहे मन्त्री महतं माओवादीं जंगली रुपं प्रर्दशन याःगु धयादिल । पत्रकारत नाप खँल्हाबंला यानादिसें वयेकलं शान्तिपूर्ण आन्दोलन यायेगु अधिकारया दुरुपयोग यानाः माओवादीं हिंस्रक जूगु टिप्पणी यानादिल ।
