माओवादीं मगरात व तमुवान गणराज्य घोषणा
एकीकृत नेकपा (माओवादीं) बिहीवाः मगरात व तमुवान यानाः थप निगू गणराज्य घोषणा याःगु दु । माओवादी महासचिव रामबहादुर थापा 'बादलं' पाल्पाया तानसेनय् मगरात स्वायत्त गणराज्य घोषणा यानादीगु खःसा मेम्ह नेता देव गुरुङं पोखराय् तमुवान स्वायत्त गणराज्य घोषणा यानादिल ।
पाल्पाया तानसेनय् ऐतिहासिक मू लुखाय् तयातःगु मगरात स्वायत्त गणराज्य घोषणाया बोर्ड ल्ह्वनाः महासचिव बादलं गणराज्य घोषणा यानादीगु खः । पाल्पा, गुल्मी, अर्घाखाँची, बाग्लुङ, रुकुम, रोल्पा, सल्यान, प्युठान, म्याग्दि यानाः गुगू जिल्लायात माओवादीं मगरात स्वायत्त गणराज्य याःगु खः ।
उगु ज्याझ्वलय् महासचिव बादल, प्रवक्ता दिनानाथ शर्मा, सचिवालय दुजः टोपबहादुर रायमाझी, पोलिटब्यूरो दुवः वर्षमान पुन 'अनन्त', लोकेन्द्र विष्ट, जनार्दन शर्मां शोषित, पीडित, उत्पीडित वर्गया अधिकार सुनिश्चिताया निंतिं देय् संघीयताय् वनेत्यंगु धयादिसें माओवादीया गणराज्य घोषणां जनताया दथुइ संघीयताया महत्व ध्वाथुइकेगु ज्याः याःगु धयादिल ।
ज्याझ्वलय् जनजाति महासंघया महासचिव रामबहादुर थापामगर, मगरसंघया संस्थापक अध्यक्ष लोकबहादुर थापामगर, अनेमसंघ क्रान्तिकारीया अध्यक्ष जयपुरी घर्तीमगर, वाईसिएलया अध्यक्ष गणेशमान पुन, नेपाल मगर संघया महासचिव वसन्त घर्तीमगर लगायतया उपस्थिति दुगु खः ।
अथेहे तमुवान स्वायत्त गणराज्य जिन्दावाद धासें नेता देव गुरुङं तमुवान घोषणा यानादिल । माओवादीं कास्की, स्याङ्जा, तनहुँ, लमजुङ, गोरखा, मनाङ, पर्वत व मुस्ताङ यानाः च्यागू जिल्लायात तमुवान गणराज्य घोषणा याःगु खः ।
गणराज्य घोषणा यानादिसें माओवादी स्थायी समिति दुजः देव गुरुङं संसदवादी दलतय्सं संविधानसभा पाखें संविधान च्वयेगु ज्यायात गम्भीरता पूर्वक मकाःगुलिं जनदावाव स्वरुप गणराज्य घोषणा यानाःगु धयादिल । वयेकलं घोषणां संविधानसभाया अवमुल्यण मजूगु व संविधानया उल्लंघन व शान्ति सम्झौता विपरीत मजूगु दावी यानादिल ।
वयेकलं गणराज्य घोषणा जातिवादी व विण्डनकारी मजूगु बरु जातीय उत्पिडनय् लाःपिं समुदायया उत्थान जुइगु दाबी यानादिल । तमुवान क्षेत्रय् च्वनिपिं नागरिकया राष्ट्रियता तमु जकया मखसें दक्वं जातजातिया जुइगुलिं सुंनं ग्याये म्वाःगु धयादिल ।
थ्वस्वया: न्ह्य: माओवादीं लिम्बुवान, कोचिला, सेती-महाकाली, थारुवान, किराँत, शेर्पा, भेरी-कर्णाली, भोटे-लामा स्वायत्त गणराज्य घोषणा यायेधुंकूगु दुसा म्हिगः तिनि नेवाः व ताम्सालिङ स्वायत्त गणराज्य घोषणा याःगु खः। मिथिला, भोजपुरा व अवध ल्वाकछ्यानाः कन्हय् मधेश राज्य घोषणा याइगु ज्याझ्वः दु ।
